عزيزاتي اللي تفضلتوا عندي في المجلس ..خلوني أسلم عليكم أول....
يا هلا ويا مرحبا حياكم الله ....شلونكم شخباركم.. الله يسلمكم ويطول باعماركم..

بعدين.. سمي القهوه لا تبرد..تفضلي (ألذ قدوع للقهوه من عمل إيديه وحيات عينيه )

وما ننسي حبيب الكل الشاي بالزعفران...مع القلوبات (المكسرات المملحه )
عسي الشكر مو زايد بس ...سامحيني تراني أحبه شيره....أهو عطيني بيالتك أزيدها شاي..

نبدأ....
بسم الله....
لايختلف إثنان أن السنع من أبرز صفات المرأه الناجحه....وأظن شفتوني كلي سنع استقبلتكم وضيفتكم قبل ما أدخل في موضوعي....يكون مراكش سنعه ( يا ريت)..
فعلا هذا هو الموضوع.....أفتقر إلي السنع وأظن في نسبه بالمنتدي مثلي فهلم يا سنعات المنتدي لتأخذوا بأيدينا إلي عالم السنع............................................و هذا أول الغيث


القطره الأولي...إذا زارتني وحده معاها طبق حلو(كيكه حلو قهوه كنافه أي شئ)
شنو المفروض أسوي....آخذه منها وأرفعه بالمطبخ وأقدم اللي عندي وإلا آخذه وأضيفها فيه؟؟؟

القطره الثانيه...إذا كان هناك حساسيه في تعاملي مع أهل زوجي (مرتاحه مع زوجي لكن بناتهم لسانهم طويل )...يحبون يتطنزون علي عيالي جدام الناس خاصة الولائم الكبيره..اللي فيها أجناب..هذا يشبه الممثل الجيكر الفلاني وهذه طالعه لخوالها وووووما أدري شنو أقول فشله الأجناب وبيني وبينكم ما ودي أخربها معاهم عشان زوجي ما يستاهل ...بس المعاييب دايما علي لسانهم ....محتاره شلون أصير سنعه مع هالأشكال

القطره الثالثه.....والا أقولكم زين إذا رديتو علي بهالأثنين......والخير بقباله

السلام عليكم ورحمة الله وبركاته
اختي اعذريني ما معنى كلمة ( سنعة ......سنع .....سنعات )
بالنسبة لهؤلاء الناس احيانا ما يعرفوا غلطهم الا اذا الواحد سوى فيهم نفس الموقف
او انك تسكتي وما تبتسمي لهم ولا تنظري لهم ساعتها .... عشان يعرفوا انك محترمة وما تحبي هذه الأشياء .
هذا ما لدي
تحياتي

أهلين سيده .. ( معليه مراكش .. شويه.. برد عنك )
السنعة . معناتها .. ( ظفره .. أو نشميه ..أو شقرديه ... أوووووو خلاص.. سنعه ) ...
(فسر الماء بالماء )
يعني اللي تعرف تدير بيتها مضبووووووووووووووط ..

مرحبا .. مراكش .. السنعة .. تسلمييييييييين على القهوة .. تهبل ..مممممم
بس .. لالا .. حلفت .. مايصب الشاهي إلا أنا -------> يعنني سنعه
وبالنسبة لقطراتك ..
القطرة الأولى ... لازم تجيبين حلاها وتقدمينه .. وإذا كنت أنت مسوية بعد .. تجيبين الإثنين.

أما بالنسبة للقطرة الثانيه .. أتمنى الأخوات يفيدونك .. ( أخاف أوهقك) .

مرحبا ...في السنعات
أختي سيده فهمتي معني سنع وإلا أزيدك.....هذه كلمه بلهجتنا الكويتيه تعني ...ست بيت ممتازه وتتعامل مع المواقف بلباقه وفهم....وأشكرك جدا علي الرد...وبصراحه هذا اللي أسويه ما أطالع فيهم أصلا بس تدرين هم ما يوجهون الكلام لي بس يسمعوني والحاضرين يعني كأنهم يكلمون بعض ماشاء الله هم كثار 8 بنات وماخذين بنفسهم مقلب علي الآخر....وأنا دايما بروحي أهلي ليسوا من نفس المنطقه فما يحضرون عزايمهم وايد......
توتي بعد عمري ما قصرتي علي الشرح...جزاك الله خير بس ودي تفيديني أكثر (طماعه).
ومشكوره علي مساعدتك في صب الشاي حقيقه إنتي سنعه...وبسوي بكلامك في مسألة الحلو..

خواتي اللي ما شاركوا القطرات وايد بس تعالوا وريحوني تري أسألتي ما تخلص..
وانتوا كلكم كرم كما عرفناكم دائما........

شوفي حبيبتي مراكش..
سألتلك أهلي.. وردوا علي .. وقالوا
تقول لزوجها .. وإنك ماترضين على عيالك .. (حتى هو ماراح يرضى ) .. لأنهم عياله .
والباقي عليه .
يأدب أخواته

بعدين شلون يعيبون على .... عيالهم .... غريييييييييييييبه

وانشاء الله ماأكون .. وهقتك

والله ضحكتيني ...يأدب خواته قال ......هالنوع من الناس الأم تغرس فيهم من الصغر خواتك خواتك.....لو تشوفين شلون يستقبلونه لما ندخل عليهم قبلات وأحضان ويموتون بعياله جدامه وبس يروح تعالي وشوفي .....ولا كأنهم يعرفونهم .......بس الكذب خيبه ما أقدر أقولك إنهم يغلطون علي أو أي شئ ثاني ...بس سالفة هالحقران اللي من غير سبب ما يطالعونك وانتي تتكلمين وما يوجهون لك حديث وتعييبهم بالنازله والطالعه علي العيال قال تنكيت يعني ....ولما أشكي لزوجي يقول مثل ما يسوون لك سوي لهم وما عليكي منهم...بس مشكلتي إني حاره بزياده
يعني ما أصبر علي الغلط لما أشوفه .....وهذا اللي متعبني بحياتي نفسي أصير مثل اللي يطنشون كأنهم ما يسمعون ولا يشوفون شئ جدامهم إلا اللي يبونه......أتمني من كل قلبي وحده تتبرع وتعلمني نظرية...طنش تعش تنتعش ...وكيفية تطبيقها في حياتي المليئه بالإنفعالات....تراني بصراحه تعبت
توتي لا تزهقين مني (ما صدقت إن أحد عطاني وجه )...بس لك الأجر انشاء الله...

الحقيقه إنكم ما قصرتوا يا بنات.....
ردودكم تونس خاصه الواحد لما يشوف فيه أحد يعاني مثله يا أخت روان تهون عليه مشكلته...
أختي أم وديمه إنتي ما تخلين من الحلي وين ما رحتي معاك ...الله يحلي أيامك حبيبتي أنا مو عارفه أطبق هالنظريه لأنكي من كثر ما أطنش صرت كأني حطبه قاعده لا أهش ولا أنش لدرجة حتي صوتي يتغير من كثر السكوت لما أكلم زوجي بعد الطلعه يقولي شفيه صوتك أقول من كثر السكته....بصراحه مليت ودي أفتح مواضيع ما تسبب مشاكل بس كل شئ يتطنزون عليه أويسكتون ما يردون بكل بساطه .....صراحه مزهقيني بس الحمد لله هذه ولا غيرها صح بنات
ماعليه سامحوني دوختكم معاي
سيده ودي أسوي مثلك إني أعامل الناس رسمي شوي عشان يحترموني أكثر...بس طبيعتي غير
يمكن يوم من الأيام تضبط معاي هالحركه وشكرا علي المشاركه ...وتري ما أقدر ما آخذ العيال لجدانهم......أبوهم يزعل وتعرفين هو راس المال الله يحفظه وما يخلينا نزعله ولا دقيقه....ولأجل عين تكرم مدينه