اول مره فى حياتى اواجه مثل هذا الموقف مكنتش متخيله انى ممكن اشوف فأر فى بيتى ابدا ابدا ابدا ابدا
هحكى لكم الحكايه


انا بقالى حوالى 4 ايام بعانى من فأر صغير دخل المنزل من الرغم ان المكان الذى اسكن فيه مكان متميز
المهم انا اولادى لما شافو الفأر اترعبو كنا جالسين كلنا فى الرسبشن بنتفرج على التلفاز وفجأه شفنا الفار
رغم خوف الاولاد منه بس لما وجدوا اننى لا اظهر اى علامات الخوف ابتدى الخوف يروح منهم وابتدوا ينظروا للفأر بدون خوف وخصوصا انو كان صغير جدا وكان خايف اكتر منهم
وبيعمل حركات زى العسل
المهم حاولنا نفتح له الباب ليخرج ولكنه كان خايف حاولنا نفتح شباك المنور لانه كان بيحاول الصعود ولكنه لا يستطيع بس من خوفه استخبه فى الجزامه
انا مش من النوع الى بيخاف والحمد لله ومعوده اولادى على كده بس فى حجات الواحد مش بيحب يشوفها خالص
ومن ضمنهم الفئران
المهم بعد يوم سمعنا حركه فى المضبخ عرفت انو مستخبى فى الحافظه بتاعة الحراره الى فى الفرن من الاسفل
بصراه بصراحه كنت عاوزه اسيب البيت واروح عند ماما واسيب زوجى يتصرف بس حسيت ان دى حركه مش كويسه منى وتدل على عدم تحمل المسؤليه وشكلى هيكون وحش امام الاولاد
حاولت امسك اعصابى واتصرف بهدوء رغم بينى وبنكم انا مبقاش فيا اعصاب

جبت سم فئران ووضعته على قطعة فلافل ووضعته لهم على ورقه فى حافظة الفرن وتركتهم يوم اخر طبعا بنتى مريم زعلانه انى هموته وعماله تقول لى ياماما حرام بس قلت لها انا بعمل كده علشان خايفه على صحتكم
المهم بشوف أكلوا السم ولا لا اكتشف انهم فأرين مش فأر واحد يالهوووووووووى صعقت اتنين صغيرين مبقتش عارفه اعمل ايه

لا والغريبه لم يأكلوا حاجه من الطعام الى فيه سم وكانوا نايمين واحد حاطت دماغه على الاخر شكلهم كان تحفه
من كتر ما انا مش مصدقه انهم اتنين كل شويه افتح واتاكد

كلمت كل من اعرف اعمل ايه حد يلحقنى انا عندى فأرين

بعثت ابنى لبتاع المنظفات الى جاب من عندوا السم وحكى له حكاية الفئران وقال له اصعب حاجه الفئران الصغيره مينفعش معاها غير المعجون اللاصق

وبالفعل لسه اليوم او الان وانا بكلمكم وضعت المعجون على قطعة خشب وفى وسطه قطعة لانشون ووضعته امام البوتجاز وفجأه سمعت صوت رحت اشوف لقيت الفأر لاصق فيه وعمال يصرخ ويعمل اصوات غريبه علشان يحاول يخرج ومعرفش موقف غريب جدا جدا والله صعب حد يتخيله

انتوا عارفين مبقتش عارفه اعمل ايه امسكه بالخشبه وارميه فى الشارع ولا اشيله من على الخشبه فى كيس وارميه ياربى كان جسمى كله بيقشعر والفار كان صعبان عليا وفى نفس الوقت مش عوزه ابين للاولاد انى متوتره وشكله مش ظريف خالص وقلب الفار عمال يدق شكله باين وعمال يتنفس بصعوبه مش عايزا حد يتريق عليا ماشى

المهم جبت كيس وادخلت فيه يدى وحاولت اخراجه من على المعجون بس اول مره مش قدرت
اتصلت بزوجى وقلت له قال لى شليه وارميه كله ملصق فى بعضه الان ومش هيعرف يتحرك حاولى تشليه وترميه قبل ما يخرج نفسه
بينى وبنكم مكنتش قادره حاولت مره تانيه وقربت من الفأر وقلت له انا اسفه انا مش عايزه اموتك انا هدخلك فى الكيس وارميك فى صندوق الزباله الى فى الشارع وانت اخرج بقه
بجد انا قلت كده للفار وفعلا شلت الفأر فى كيس وقلب الفأر عمال يدق حاسه بيه تحت يدى وانا قلبى هيقف خلاص طبعا مفيش حد من الاولاد رضى يذهب علشان يرميه نديت للبواب وقلت له الكيس ده فيه فأر خذه ارميه فى صندوق الزباله

ابنى حافظ لقيته بيقول لى ياماما انتى جالك قلب ازاى تشليه انتى غريبه
طيب كنت اعمل ايه ما انا خايفه على الاولاد وكنت لازم اتصرف

انتوا عارفين انا اول مره فى حياتى اتعرض للموقف ده انا قلبى هيقف خلاص من كتر الدق واعصابى خلاص مفيش اعصاب

دلوقتى فاضل فأر ثانى يارب هوه كمان يلصق على المعجون واخلص بقه من الكارثه دى انا مبقتش مستحمله اعصابى خربت خالص ......................
ادعولى انا بجد خلاص