السلام عليكم ورحمة الله وبركاتة

بصو بقى انا هقولكم شوية حاجات اتمنى تستفادو بيها يارب
واتمنى الموضوع ينال اعجابكم يفيدكم


ادعولى ربنا يكرمنى بالحمل الصالح عاجلا غير اجلا انا وكل مشتهى ومحروم

اول حاجة هقولهالك

* نظفى بيتك اول باول
طبعا مش جديدة
بس فى ناس تقعد تقول هنسيب التنظبف لاخر الاسبوع

لا صدقينى اول باول نظفى اى حاجة عينك تقع عليها مش نضيفة
وخلى ليكى جدول نظافة يومى كالاتى

اول المطبخ

غسل البوتجاز يوميا
تنضيف المواعين اول باول
رمى المهملات اول باول والتخلص منها علشان متعملش ريحة
استخدام فويل لتغطية البوتجاز والزجاج الخلفى بيحافظ علية
استخدمى السلك الناعم فى غسل المواعين والحلل بيخليها تلمع وتبرق والله
نصيحة صغنونة حطى جمب ازازة الصابون السايل ازازة شاور صغيرة او صابونة بريحة تغسلى ايدم بعد المواعين علشان ايدك مش تتاثر
تمسحى الارض يوميا بصابون وسلك
وبعدين تعملى خلطتى الشهيرة
كلور +فينيك + صابون سايل
وتضيفى على جردل المسح
بعد المواعين ما تنشف تدخيلها ومتكسليش علشان متعمليش كركبة
واخر حاجة هقولهالك طلعى اللى بتستعملية بس مش لازم تملى الرخام بحاجات عالفاضى
ولو عوزة توفرى عليكى وقثت ومجهود لو ظروفك تسمح هاتى غلاية ماية ( كاتل) صحية ومفيدة جداااااااااااااا
واخيرا هاتى باستمرار كربونات صوديوم وملح ليمون بيساعدك على نضافة الاستنلس والكوبيات

ثانيا الحمام

كل يوم اول ما الزوج يروح الشغل والولاد يكونو فى المدرسة وتصحصحى وتفطرى كدة

جهزى علبة بلاستيك او كوب بلاستيك كبير فى الحمام وفية صابون سايل وكلور وادعكى البانيو بسلك ناعم والحوض والتواليت من برة وجوة كويس واشطفية بمية

وامسحى الارض بنفس الخلطة اللى فاتت

غيرى فوطة الحمام كل يوم علشان مش تعمل ريحة

وياسلام بقى لو وانتى فى الحمام املى طبق كبير بمية سخنة وحطة فية كلور قليل ومسحوق غسيل يدورى وانقى الغيارات البيضة

ودى ممكن تعمليها بليل وتحطيهم فى الغسالة الصبح او تحطيهم الصبح وتغسليهم بليل براحتك

بالنسبة يا قمر لاوضة النوم بتاعتك او الاولاد

تغير الملايات على الاكتر مرة كل اسبوع

وياريت تحاولى تطلعى المخدات والبطاطين على الحبل يتشمسو فى يوم مشمس كدة

وهاتى المكنسة الكهربا
ايوة المكنسة

واكنسى المراتب لان للاسف فى ناس بتنفض المراتب مهو اللى بتنفضية بيرجع تانى
ونفتح الشابيك كدة تغير جو للبيت

وتكنسى السجادة بالمرة وبعد ساعة كدة تفرشى الملاية لو هتغيريها وتقفلى الاوضة ولو عندك جزء من السيراميك او البلاط ظاهر هاتى جردل المسح وبنفس الخلطة وبالشرشوبة اعملية

وطبعا قبل المسح تلمعى خشب الاوضة ( الموبيليا ))

ونفس الكلام لباقى الشقة
تحاولى تهويها وتدخلى الشمس
وكنس السجاد يوميا والمسح باستمرار

شوية نصايح عن الغسيل

اغسلى الابيض لوحدة
الفاتح لوحدة
الغامق لوحدة

خلى بالك كويس فى هدوم وانتى عروسة جديدة بتنزل لون تخدى بالك تتغسل لوحدها لان الحمد لله هدوم عندى باظت لانى مكنتش اعرف فكنت بجرب خاصة الصيفى والاقطان والفسكوز

وبلاش تقولى علشان اطلع الغسيل بيبر ق تخلى المية مغلية فى الغسالة للاسف انتى بتهلكى الهدوم

اول ما الغسالة تقف تطلعى الهدوم وتفردى واحدة واحدة فى الطبق بعد ما تشطفية كويس علشان الهدوم مش تكرمش ومفيش حاجة تقع وانتى بتنشرى يا هانم زى حالاتى

طبعا الحبال بتتمسح قبل النشر باستمرار علشان متكونش متوسخة وتحطى الغسيل وتلاقى التراب معلم فيه

وياريت يا امورة منك ليها تكنسى البلكونة وتمحيها هى والسور قبل النشر

ولو لقيتى الجو مغيم تجيبى مشمع من اى محل ادوات منزلية وتفرشية عالغسيل علشان لو الجو مطر

اتفقنا

بصى يا قمر هقولك شوية حاجات فى المطبخ

مش تنضيف علشان متزهقيش

بس تجهيزات للاكل

بصى يا قمر لو جوزك دخلة شهرى او اسبوعى هاتى اللى يكفيكى من السوق او الماركت فترة طويلة
والفراخ تشطفيها وتغسليها بالدقيق واتشطفيها بمية بخل
وتستنى اما تتصفى وتقسميها على اد كل اكلة
يعنى لو انتى وجوزك بس سيبى نص فرخة فى كل كيس مش لازم فرخة كاملة والاكل يكون بايت
ونفس الكلام اللحمة تقطعيها وتقسيمها اكياس
البانية تغسلية كويس وتشطفية وتبلية
ملح
فلفل
بهارات
قرفة
بصلة صغيرة
شوية خل

وتقسمية اكياس وتشيلية فى الفريزر وكدة بيكون طعمة جنان

الكفتة نفس الكلام تقسميها على اد كل اكلة

والسمك تنضفية وتصفية كويس وتقسمية

لو عارفة ان عندك عزومة هاتى الحاجة وجهزيها
ودايما خلى عندك فرخة سليمة و كيس سمك وكيس لحمة كبير علشان لو حد جالك فجاة يا قمر

طبعا يا قمر فى حاجات هتعمليها كل يوم وفى حاجات بتوفر معاكى
هقولك
يعنى مثلا اما تلاقى الطماطم رخيصة هاتيها وسبكى وقسمى اكياس وعالفريزر
لقيتى الفاكهة اللى تنفع عصير رخيصة هاتى وشيلى اكياس
مشمش
برتقال معصور
فراولة
جوافة
مانجة معصورة او سليمة



ممكن بقى لو انتى شاطرة ودة عشمى فيكى تجيبى بصل وتقطعية وتحمرية وتشيلية هيكفى مثلا 10 ايام بس فى التلاجة مش الفريزر
وتجيبى توم وتقشرية وتفرمية وتحطية فى علبة او كيس نايلون فى الفريزر وتسحبى على اد كل مرة
وطبعا انتو شاطرين فى البيت هتخزنو الخضار
البامبة
البسلة
الفاصوليا

ومتقسمة اكياس وبتنفع فى رمضان والزنقات اوى

ومحدش يقول انى رغاية بصى يا قمر
بالله عليكى بلاش اعتزازنا بالقطن المصرى وتجيبى كل هدومة تكركبى المطبخ وتقولى بينفعونى فى المسح والرخام
لا فى حاجات شكلها اشيك وقطن ب2ونص فاى محل ادوات منزلية وبيكون شكلها احسن

بس بلاش كركبة


اتفقنا اهو



اظن كدة عملت اللى عليا لو افتكرت حاجة تانى هجيلكم
لو مجتش ادعولى