من فضلك يا ام قسمت بعد ما غلبتك معايا فى الورشة السابقة عايزة اعرف الكور الصغيرة دى بتتعمل ازاى


وكمان من فضلك عايزة اعرف الغرزة دى بتتعمل ازاى علشان شكلها عجبنى قوى

وربنا يديكى الصبر على لغاية لما اتعلم التريكو وربنا يجعله فى ميزان حسناتك

ان شاء الله تدخل ام قسمت وتساعدك

السلام عليكم
غرز جميله جدا يارب تدخل ام قسمت وتساعدك

بصي ياقمر الغرزه الاولي تريكو ودي اشرحها لك بالتفصيل
الثانيه كروشيه بس مش قادره اركز فيها يمكن غرزه الياسمين وياريت خبيرات الكروشيه يفيدونا

بصي ياقمر
انتي بتحددي الغرزه اللي حاتعملي فيها الكوره دي
لو الباترون ماقالش لك عدد الغرز اللي حاتعمليها في الغرزه دي اعملي 5غرز
الغرزه عندك لها خيط خلفي وخيط امامي مش كده
بتشتغلي عدل في الخيط الامامي وبعدين مش تطلعي الغرزه من علي الابره اليسري
دخلي الابره تاني في الخيط الخلفي واعملي كمان غرزه وارجعي اعملي غرزه في الخيط الامامي وبعدين غرزه في الخيط الخلفي وبعدين كمان غرزه في الخيط الامامي وخلاص طلعي الغرز او اسحبيها علي الابره اليمني
سيبي باقي السطر واقلبي وضع الابر يعني امسكي الابره اليسري في ايدك اليمين والابره اليمني في ايدك اليسري وكده حاتلاقي الغرزه اللي عملتي فيها ال5غرز بقت في الابره اليسري
اشتغلي علي ال5غرز دول مقلوب وبعدين غيري وضع الابر تاني وخدي ال5غرز دي في غرزه واحده تاني
يعني كترتي الغرزه واشتغلتي عليها سطر ورجعتي لميتيها تاني في غرزه
فهمتيني
ممكن تشتغلي علي ال5غرز دول اكتر من سطر واحد يعني ممكن 3سطور بس المهم ترجعي تلميهم في السطر اللي كنتي فيه اصلا وتكملي عادي وكده حاتتكون معاكي الكوره دي
ممكن تعملي الغرز باي عدد حسب الحجم المرغوب فيه
وممكن تعملي زياده الغرز بطريقه زياده اخري زي اللفه
وشوفي الفيديو ده يساعدك في فهم ازاي تشتغلي في الغرزه من الامام والخلف
http://www.knittinghelp.com/apps/fla...yer/play/120/1

جزاك الله خيرا يا ام قسمت

يا ام قسمت يعنى اعمل فى كل غرزة من 5 غرزة من قدام وغرزة من ورا وبعدين اطلعها من الابرة كل واحدة على حدا يعنى هيبقى معايا 10 غرز ولو صح ازاى اخدهم كلهم فى غرزة واحدة