انا لون الموبيليا عندى بنى محمر
ونفسى اغير لون غرفه الاطفال
وعايزه اعرف منكم اى لون يكون حلو
بس للعلم انا هغيرها بنفسى
يعنى ادهنها انا فى البيت بايدى
وجزاكم الله كل خير

السلام عليكم اختى العزيزه انا من هوايتى اغير لون الموبيليا عندى وبأيدى كمان بس كنتى قولتى هى لاكيه والا استر { مصبوغه بصبغة الاستر } على العموم هى لو بالاستر حيكون عندك 3 الوان بس اللون الجوزى والماهوجنى والاسود وده طبعا بتجيبيه من عند النجار بتاع الموبيليا لان هو اللى بيجهزه بس لو كانت الغرفهمدهونه باللاكيه يبقى قدامك الوان لا حصر لها زى الروز او نقول الوردى بكل درجاته والاصفر برضو بكل درجاته والازرق بدرجاته الفاتحه والسيمون والبصلى بس انا عوزاكى تاخدى بالك الاول من لون الجدران عشان مايبقاش الجدران فى وادى والموبيليا فى وادى تانى ولو الجدران واخده لون سن الفيل او الاصفر الفاتح او البيج يبقى حتطلع كل الالوان حلوه عليها ونسيت برضو اقولك لازم تجربى اللون على لوح خشب من بتوع السرير الاول لان ممكن تحبى تفتح اللون شويه او تغمقيه وطبعا انتى عارفه ان لازم انك تدهنى وش وتسيبيه ينشف وبعدين تدى وش تانى وكمان لو لون الخشب غامق ادى وش لاكيه ابيض خفيف وبعدين اللون اللى اخترتيه وممكن كمان لو فى رسمه اوشكل اوحفر بارز اوغائر على الخشب انك ممكن تستخدمى لونين الخشب كله بلون والرسمه او الشكل البارز او الغائر بلون تانى وطبعا لازم يكونو متناسقين ولو فى اى سؤال تانى انا تحت امرك ويارب تستفيدى منى والسلام عليكم ورحمة الله وبركاته .

اه نسيت اقولك لازم قبل ما تبدأى بالدهان تصنفرى الموبيليا بورق الصنفره الناعم اوى بس على خفيف ماشى وربنا معاكى .

ميرسى اووووووووووووى
انك اهتميتى ورديتى عليه
ما شاء الله باين ان عندك خبره
تسلمى وجزالك الله خير