مرحبا يا امهات كيفكم ان شاء الله كلكم تكونو بخير انتو واولادكم وازواجكم يا رب..

اذا في اي وحدة بيعاني احد اولادها من اي مشاكل في السمع النطق او اللغة تحكيلي وانا بساعدها على قد ما بقدر ان شاء الله...
اذا شاكة بسمع الطفل, طريقة نطقه للحروف, تطوره اللغوي, او اذا بيتأتإ احكولي المشكلة ...
وعلى فكرة هاد تخصصي اللي بدرسو في الجامعة يعني ما رح اجيب اي معلومات مو مزبوطة...

انا عندي ولد عمره 4 سنوات و3 شهور وهو ينطق السين ثاء والراء لام وكان يقول الكاف تاء وبعد اتعلم يقول الكاف صار يقلب كل كاف وتاء للكاف ويقول الجيم دال وبالتالي ينطق الكلمات خطأ وبصعوبه وممكن الناس ما تفهمه بسهوله ايش اسوي معه وشكر كبييييييييييييييييييير لك

أهلا و سهلا بك ، أشكرك لمساعدتك للأمهات
أغلب الأمهات يعانين من لفظ حرف الراء فكيف نعالج الأمر و كيف ندرب الأاطفال على نطقه .

جزاك اللة خيرا عاوزة اسالك هل مشكلة التاتاة فى الكلام بتعدى ابنى عندة ثلاث سنوات واربع شهور وجية جار لنا جديد وعندة ست سنين بس بيلالا فى الكلام خالص منساعة ما ابنى بقى يلعب معاة بقى يتكلم زية باخدة فى حضنى واقولة يا حبيبى اتكلم براحة انا سمعاك مش عارفة اعمل معاة اية

كتبت بواسطة h3m
انا عندي ولد عمره 4 سنوات و3 شهور وهو ينطق السين ثاء والراء لام وكان يقول الكاف تاء وبعد اتعلم يقول الكاف صار يقلب كل كاف وتاء للكاف ويقول الجيم دال وبالتالي ينطق الكلمات خطأ وبصعوبه وممكن الناس ما تفهمه بسهوله ايش اسوي معه وشكر كبييييييييييييييييييير لك



اختي h3m لا شكر على واجب
شوفي انا اول اشي رح احكيلك عن كل مشكلة على انفراد بعدين رح احكيلك النتيجة النهائية

اول اشي رح استخدم لفظ عمر الاكتساب والمقصود فيه انو على هاد العمر الطفل بيقدر يستخدم هاد الصوت في جميع الكلمات والمواضع (اول وسط اخر), وممكن الطفل يكتسب الاصوات قبل عمر الاكتساب وهاد طبيعي جدا لكن اذا لم يكتسب الطفل الصوت بعد 6 اشهر من عمر الاكتساب بيبلش الواحد يقلق وبيلزم وقتها تدخل اخصائي النطق.

- نطق السين ثاء: عمر الاكتساب لصوت السين هو 5 سنوات, يعني معو سنة على ما نحكي انو في مشكلة.
- نطق الراء لام: عمر اكتساب صوت الراء هو 5.6 يعني لسة ضايل سنة ونص تقريبا على ما نقول في عندو مشكلة.
- نطق الجيم دال: اشي طبيعي انو ما ينطق الجيم لانو برضو عمر اكتساب حرف الجيم (الثقيل: يعني متل ما بيحكوه اهل الخليج مو متل اهل الشام ومصر بيحكو الجيم الخفيفة), هو 8.4 يعني لسة مطول على ما تطلبي منو هاد الحرف حتى لو بتحكو الجيم الخفيفة, لكن المثير للاهتمام انو بيحكيها دال وبالنسبة لعمرو المفروض انو ما يحكيها دال, وعشان اقدر اجاوبك بدقة اكبر احكيلي هل في كل الاوضاع بيقلب الجيم لدال؟؟
-وكان يقول الكاف تاء وبعد اتعلم يقول الكاف صار يقلب كل كاف وتاء للكاف: احكيلي بالاعمار متى تعلم الكاف ومتى بلش يحي الكاف تاء؟ وهل في كل مواضع الكلمة بيحكي التاء كاف؟ وهل تعلم الكاف لحالو ام بتدخل من احد؟؟

وهل في احد بالعيلة عندو اي مشاكل نطق او سمع؟؟
هل كان جميل المراحل التالية في عمرو سليمة؟؟ الحمل والولادة, الحركة, اي مشاكل طبية؟؟ انا جاوبتك على اساس انو كل اشي من هدول سليم لكن اذا في اي مشكلة احكيلي اياها عشان تاخدي الجواب الصحيح.

واللي بدي اياه منك تعرفيلي اذا كان بيميز بين الحروف اللي ما بيحكيها, يعني هل بيعرف الفرق بين السين والثاء, يعني لو قلتيلو (ثيارة بدل سيارة) بيعرف انك بتحكي غلط؟؟ بس لما تجربي تعرفي ما تعطيع اي دليل على الجواب الصحيح لا بتعابير الوجه ولا حركات الجسم وما يكون حد جنبك اللي يحسسو بالجواب الصحيح, اعرفي كل حرف ما بيحكيه هل بيعرف يميز بين اللفظ الصح الغلط ولا تنسي الكاف والتاء اتاكدي بحذر.

الله يخليكي يا اختي جاوبي عن كل اسئلتي عشان اقدر اساعدك.

كتبت بواسطة ام البنين1977
أهلا و سهلا بك ، أشكرك لمساعدتك للأمهات
أغلب الأمهات يعانين من لفظ حرف الراء فكيف نعالج الأمر و كيف ندرب الأاطفال على نطقه .



ام البنين الله يخليكي انتو كلكم اخواتي وهاد واجبي وكتم العلم حرام

اول شي لازم اعرف عمر الطفل عشان اعرف اذا التطور طبيعي ولا عن جد في مشكلة, ونصيحة مني لجميع الامهات ما تحاولو تدربو اطفالكم لوحدكم عشان وقتها بيكون في خطر انو المشكلة تصير اكبر وتنقلب بطريقة بيصير صعب علاجها لان التدريب مو مسالة سهلة متل ما الناس بيعتقدو لا, في اشياء كتيرة لازم تتاخد بعين الاعتبار.

كتبت بواسطة شذى الامسية
انا ولدي عبدالله عمره خمس سنوات وبعد شهرين راح يدخل الست سنوات

المشكله انه لحد الان اللي يسمعه يتكلن يقول هذا ولد عمره 3 سنوات لانع ما يعرف كيف يصيغ الجمل كويس وعنده مشكله في نطق الحروف(ث ،ذ ، ظ، ض) كلها ينطقها حرف ف
مع اني احاول قد ما اقدر اني اصحح له النطق وبدا يتحسن بس اللي ازعجني انو مديرة الروضه قالت لي انو اذا وضعه ما تحسن ما تبغاه السنه الجايه مع انو السنه الجايه تمهيدي واللي بعدها يدخل اول ابتدائي وعندي ولد بعده اصغر منه بسنه ويقلده مئه بالمئه يعني حتى لو الكبير اخطا وعاقبناه هو كمان يخطئ عشان نعاقبه زيه

فمرة متخوفه اتمنى انك تساعديني



اختي شذى الامسية

اول شي ابدا ابدا لاتعاقبيه على اي خطأ في النطق, انا مقدرة حرقة قلبك لكن اياكي اياكي لان هاد الاشي رح يكبر المشكلة اكبر واكبر وتصير كمان مضاعفات نفسية كبيرة.

هل في احد بالعيلة عندو اي مشاكل نطق او سمع؟؟ سواء من طرفك او طرف الوالد او احد اخوانه غير الاصغر منه اللي بيقلدو؟
هل كان جميع المراحل التالية في عمرو سليمة؟؟ الحمل والولادة, الحركة, اي مشاكل طبية؟؟

واللي بدي اياه منك تعرفيلي اذا كان بيميز بين الحروف اللي ما بيحكيها, يعني هل بيعرف الفرق بين السين والثاء, يعني لو قلتيلو (ثار بدل فار) بيعرف انك بتحكي غلط؟؟ بس لما تجربي تعرفي ما تعطيه اي دليل على الجواب الصحيح لا بتعابير الوجه ولا حركات الجسم وما يكون حد جنبك اللي يحسسو بالجواب الصحيح. لازم تتاكدي انو بيميز بالسمع, وبس تتاكدي رح اقدر اجاوبك.

بالنسبة للجمل بدي منك لو سمحتي تكتبيلي جملو تماما متل ما بيحكيها عشان اقدر مستوى الجمل بالنسبة لعمرو.

اما بالنسبة لاخوه اذا انتي متاكدة انو بس تقليد وبركز اذا متاكدة انو بس تقليد وبدي تحكيلي شو اللي خلاكي تعتقدي انو بس تقليد لاخوه, اهمليه وما تعطيه اي اهميه لما يقلد ولا تعاقبيه لانو هيك بيحس انو افت انتباهكم لانو كل اللي بدو اياه يلفت انتباهكم متل ما انتو معطيين اخوه اهتمام.

بستنى اجوبتك الله يخليكي عشان اقدر اساعدك صح.