بسم الله الرحمن الرحيم

اخواتي الحبيبات يا ليت تساعدوني بأقتراحاتكم لمشكلتي اللي تعبت من كثر ما افكر فيها .. الغاليات الله يسعدكم انا ام لطفلين الكبير فيهم عمره ثلاث سنوات ونصف والصغير عمره عشرة اشهر .. المشكلة وما فيها اني ورجلي كنا مخططين اننا على شهر سته ان شاء الله نسافر لأستراليا لمدة شهر لان رجلي ناوي يكمل دراسته وعقب الشهر ارجع انا والعيال بروحنا ويكمل زوجي دراسته ويجينا بعد ثلث اشهر .. بتقولون طيب شو المشكلة ... المشكلة اني حاملة هم رحلة الرجعة بالطيارة بروحي انا والاولاد لأن عيالي الله يحفظهم اتعبوني وراووني الويل في سفريتي الاخيره واللي كانت مدتها ثلاث ساعات بس بالطيارة هذا وابوهم كان معاي .. شحال في سفرنا هذا لاستراليا واللي احتمال يكون اكثر من 14 ساعة بالطيارة ؟؟! .. مره اقول اخذ واحد واخلي الثاني مع الوالده ، ومره اقول ما راح اقدر اصبر لاني بصراحه مو متعوده افارقهم .. انا محتاره وبجد ما قادره افكر اخذهم معاي واوكل امري لله ولا اصبر على فراق واحد فيهم احسن واذا اخذت اخذ من فيهم واترك من ، فيه حاجه كمان المنطقه اللي حنا رايحين لها منطقة باردة كثير مقارنه بالخليج والكل يخوفني من احتمال ان ولدي الصغير يتعب او يمرض بسبب تغير الجو ومن ناحيه ثانية انا لسه ارضعه واخاف ان فارقته يجف حليبي ويرفض الرضاعة الطبيعية بعد ما ارجع .

شوروا علي خواتي واللي عندها خبره في مثل هالسفريات لا تبخل علي ... الله يحفظكم ويحقق كل امانيكم دنيا واخره ان شاء الله .

اختي العزيزة عاشقى الروح ...

لابد وان لك رأي مرجح فاتمنى ان تختارية .. ولا تأرجحي افكارك هنا وهناك حتى لاتتعب نفسيتك .

فلو اخذتي الرضيع معك سيتأثر الكبيرة لفراقك ولختيار اخية بدل منة وسيشعر بالغيرة ..
ولو تركتي الصغير الذي هو بأمس الحاجة لك ستسوء حالة النفسية والصحية ..
كذلك انتي بتتعبي من التفكير في محاتاتهم وش سوى وش صار فية ..الخ

وما عليكِ الا تسليم امرك لله الواحد ويكونون بمرافقتك في الرحلة (قل مايصيبنا الا ماكتب الله لنا )

والحافظ الله سبحانة وتعالى وكلها كم ساعة وتعدي على خير .

عزيزتي نجمة الخليج

تسلمين يالغالية على ردك وما تتخيلين شكثر بردتي قلبي بهالرد لأن هذا هو فعلا اللي افكر اني اسوية .. بس كنت خايفه انه يكون القرار الخاطئ خصوصا ان اهلي جميع سواء من طرفي او من طرف رجلي مو مشجعيني اني اخذ الاثنين

جزاكي الله خير وراح احاول احتاط بخصوص الصغير واعمل كل اللي اقدر عليه بخصوص تغير الجو واذا كان فيه اي نصايح او احتياطات تعرفينها انتي ولا الغاليات بالمنتدى رجاء لا تبخلوا علي

الله يسعدك دنيا واخره .. دعوه من القلب يالعزيزه ليش انك اول واحده رديتي علي والله يعلم شكثر كنت ناطره ردودكم من زود الحيره

لديك أكثر من خيار، إما أنك لا تسافري وتتركي زوجك يسافر 4 أشهر ويعود بالسلامة، وهذا إن كان خوفك كبيراً.
أو أن تسافري مع زوجك ويعيدك زوجك ويرجع إلى أستراليا.
أو أن تعودي وحدك ولكن إياكِ ترك أحد الطفلين، كيف سيدرس زوجك ومعه طفل؟ بالطبع سيتركه في حضانة أو لدى جليسة أطفال، ولن يهنأ لك بال أبداً طوال غيبته.. فاتركي عنك هذه الفكرة.
وإن عدتِ وحدك، فالرحلة الطويلة عادة تتعب الأطفال فينامون أكثر الوقت. هناك دواء اسمه benadryl، نصحتني الطبيبة بشرائه وقت السفر وإعطائه لأطفالي قبل الإقلاع، فهو يعمل على استرخائهم ونومهم لساعات طويلة، فأعطه لطفليكِ، أو على الأقل للطفل الذي لا ينام أو المتعب.
كوني جاهزة في الطائرة (إن لم يناما) بأن تكوني قد حضرتِ لهما الملهيات، يعني ما يحبا من الألعاب والألوان والدفاتر ووووو فهذا كفيل أن يشغلهما لفترة كافية.
وأهم من هذا كله، الاتكال على الله بعد الأخذ بالأسباب.
لا تنظري إلى ذاك الوقت بحيرة واكتئاب، بل تفاءلي وكوني واثقة بالله.

الاخت الغالية ايمان

بارك الله فيكي يا اختي وجزيتي خيرا

اشكر لك ردك ونصائحك وخصوصا تلك المعلومة عن الدواء الذي ذكرتيه في الرد ...

سأتكل على الله واخذ الاثنين

اسأل الله التوفيق للجميع

وشكرا لكل من تجاوب معي

عزيزتي ممكن تاخذي والدتك معك فهي ستساعدك خلال السفرة