السلام عليكم ....

يا اخواتي انا عندي مشكلة هي تعتبر بسيطة لكن والله عاجزة عن حلها ... في البداية احب اكلمكم عن زوجي هو حنووون جدا وبار بوالديه لأقصى درجة وخدوم ومايحب يزعل احد وشايلني على راسه ... وانا متزوجة من سنة ونص وحامل في شهري الخامس ... ومشكلتي مع اهله ... علاقتي اكثر من ممتازة فيهم واتمنى يكون هالشعور متبادل وماشافوا مني الا كل خير ... اكيد تسألون روحكم شنو المشكلة ... المشكلة ان عمي ابو زوجي يحب السفر الى الخليج يعني يومين او 3 ايام ويرجع... اضافة الى ان يشتغل بنظام الشفتات يعني يومين بالاسبوع يبات في الشغل ويرجع الفجر ... وزوجي هو الولد البكر وعنده اخ عمره 17 سنة واختين وامه وطبعا ابوه ... خلال هاذي الايام اللي ابوه مايكون بالبيت كنا في البداية نروح نبات عندهم طبعا بطلب منهم علشان البيت ما يكون فاضي .. وللأسف بدت تصير احتكاكات مثلا لو دخلنا البيت متأخر شوية كل من يرمي علينا كلمه مثل : توكم شرفتوا ؟؟ ... تو الناس... وغيرها لكن الحمدلله استحملت الوضع وعديتها على خير وحتى ماذكرت الموضوع لزوجي ... لكن بعد حملي بديت اواجه مشكلة بالنوم عندهم وهي فيالواقع اكثر من مشكلة صحية منها تعب الحمل والأهم الربو وماقدر استعمل الفانتولين وتكييفهم بالبيت ما يناسبني ... اوكي صار زوجي ينام عندهم وانا انام في بيت اهلي ومايخفى عليكم ان الوحدة بعد ما تتزوج ترتاح في بيتها اكثر من بيت اهلي لكن امري لله .. والحين صرت ماقدر اروح بيت اهلي على طول لأن البيت فيه صيانة وعمال ... تخيلوا صار زوجي يخليني انام بروحي في الشقة وانا حامل وتعبانة علشان يروح ينام عند اهله مع العلم ان اخوه موجود بالبيت .... بذمتكم هذا عدل ؟؟؟!! انا ماودي اقطعه عن اهله ولما كنت اقدر وظروفي تسمح ما قصرت لكن انه يخليني بروحي علشان عمي وده يسافر وهم اختارو انهم ما يسافرون ؟؟ اوكي كلهم اختاروا وقرروا الا انا اللي مالي قرار ؟؟ بصراحة شي يضايق جدا وزوجي مو حاس ولا اهمه ... وابي طريقة احسسه بهالشي بدون ما اخرب العلاقة بينهم وبينه او حتى علاقتي معاه مابيها تتأثر ... شوروا علي الله يخليكم الموضوع مسببلي ازمه خاصة وانه زاد عن حده يعني صار ينام نص الاسبوع معاي ونصه الثاني عند اهله ويخليني بروحي وانا حامل وتعبانة حتى خدامة ماعندي والله ما تصدقون المكان يصير موحش بالليل .... ساعدوني الله يخليكم بأسرع وقت ....

السلام عليكم


نصيحه لوجه الله والله علشان ما تندمين عدد شعر رأس


عديها الحين لين تولدين إن شاء الله ومع الطفل الجديد يتغير الوضع

لا تكونين أنتي من يبدأ المشاكل

وهذا مفهوم الزوج دائما

خليه هو من روحه يحس


النصيحه بلاش


وفتره وتعدي وأنا أختك

تسلمممممممممممممممين

يعني سفر عمك والد زوجك خلال هالفترة بس شهر ...شهرين ... ؟ ولاّ طول عمره حيبقى هيك نظام عمله ؟

مشكورين على الرد بنت بلدها كنت اتمنى تردين علي .... المشكلة يالغالية انا طول عمري ساكتة وماعندي مشكلة لكن تعرفين تعب الحمال وانا الى الحين اتوحم وفيني صداع نصفي والله لا يوريج تعب في تعب يعني والله مو دلع يالغالية لكن محتاجة عالاقل احد يكون يمي اذا تعبت ... وشورتج وهداية الله لكن انا خايفة اولد من هني ويظل اهوه على نظامه يعني يخلينا انا والبيبي بروحنا ويصير الوضع اصعب مع البيبي اخاف يمرض او شي واحتاجله طبيب وماعندي احد ... وتصدقين حتى اهلي مايدرون اني اظل بروحي طول الليل جان زعلوا لكن ما احب اشوه صورة زوجي بعينهم خاصة انهم يحبونه ويحترمونه .....


أفنـ أم عمر ـان مشكورة على الرد وحطيتي ايدج على الجرح ... لو المشكلة مشكلة شغله بس جان هانت اقول مغصوب مابيده شي لكنه يسافر سياحة يمر اهله ومعارفه بالخليج يتغدى بالبحرين ويتعشى بقطر ولا سائل بالبيت والسالفة زادت عن حدها صار يروح كل اسبوع ومعتمد على ان زوجي بينام هناك ... وهم اهله بعد الله يهداهم ما يسألون نفسهم ليش زوجتك ما تيي معاك والله لما احط نفسي بمكانهم استغرب شلون اخلي ولدي يخلي زوجته بروحها بالبيت وانا معاي ريال غيره وماني بحاجته .؟؟ يعني اما انه ايي برضاه وزوجته معاه وبرضاها او لأ حتى انه يخليها عند اهلها مو وضع طبيعي والله اهلي يستغربون لأن مرة زوجي كان راجع من العمرة اسبوعين وتخيلي يوم رجعته خلاني عند اهلي وراح نام عندهم ... اخواتي انا مابي احد يفهمني غلط والله لو كان لضرورة من عيوني لكن هاذي مو ضرورة انا حاسة اني مظلومة وقاعدة اسكت علشان زوجي ما يحس انه بموضع اختيار بيني وبين اهله والله يعين ....

والله شوفي ياختي دانة الكويت
ترى الوضع كلش غلط ومو طبيعي وانتي ان سكتى اللحين بكره بتشوفين الويل والهول والهوايل وإسئلي مجرب انا ما ابي اخوفك او اقلبك على ريك بس الحق ينقال اكو واحد زوجته حامل ويتركها بروحها ويروح حق اهله يبات والمصيبة انه عندهم شاب ويعني اصلا مو امه بروحها لا عندها ولدها وبنتها وبعدين يا حبيبتي والده مرتاح شايف من يسد عنه وماخذ راحته على الاخر
لا يا حبيبتي لا تسكتين يعني الواحد مو ضامن عمره ممكن تتعبين وانتي بروحك الله يستر ويبعد عنك الشر بس كل شيئ وارد شنو ممكن تتصرفين ترى والله غلط
انتي لازم تمسكين زوجك واتفهمينه لا زم ياخذ قرار
وبعدين شنو يهدك نص الاسبوع يعني يوم واحد يالله تفوت بس نص اسبوع لا كلش مو عدله
لا زم تكلمين زوجك بس مو بعصبيه لا بهدوء وبعقلانيه وتبينين له اشكثر انتي بحاجة له وخاصة بالوقت الحالي وانشاءالله يهداه
اتكلي على الله وكلميه
والله يوفقك يا رب

ورد الصبا
مشكورة على الرد وكلامج كله صح لكن ابي طريقة اكلمه فيها مثل ما قلت اهوه طيب وحنون ومو مقصر عني بشي لكن اغلب الرياييل ما يتقبلون يسمعون اي كلمة عن اهلهم حتى لو كانت صح وانا مابي يظل بقلبه اثر من هالموضوع فأبي اكلمه بطريقة ماتجرحه ولا تحز بخاطره وما اطلع غلطانة بنظره تدرين الموضوع حساس ....

خلاص شجعتوني بحاول افتح معاه الموضوع بأقرب وقت وانشالله يكون كل شي تمام ... ومشكورين على نصايحكم وعلى الرد والله يوفقكم ويجزيكم الف خير كلكم