اتمني من احد ايحل مشكلتي بعد ماضاقت بي الدنيا انا امراه متزوجه من 8 سنوات ولي ولد وبنت واحينه حامل وكبعي خجول ومب اجتماعيه المهم اتزوجت من زوجي عن طريق الاهل بس حبيته وعقب الزواج سكنت مع اهله في بيتهم مع امه واخته واخوه المهم مااعرف كيف اصفهم ناس معقدين لاقصى درجه سالفه صغيرة ايكبرونها ويسونهاعلي اقل شي مثال اذا زوجي سار السوق اشتري طماطم اتقول ليش صغير ليش جي واتسويها سالفه حتي صدقوني كرهت اكل كرهت البيت حتي اخته والله اكبر منافقه جدامي تتكلم عن خواتها وعن تصرفاتهم واذا انا قلت كلمه اتقول هي مااتحب اهل زوجها الهم عانيت منها لين مااتزوجت وافتكيت منها بس صدقوني من كل صوب تدخلات من خوات ريلي غير الحش الي يحشون فيني قامت شوت كلت شربت المهم واذا اشتكيت حج زوجي عصب عليهم واخر شي اطلع انا الغاطانه فيها تعبت والله كل ما اقول حج زوجي ابى بيت روحي ايقولي منو بيهتم فيها احنا نصرف علي البيت بس انا شو ذمبي اعيش ها المعاناه المهم ها المره انا حامل رغم انه مثل مايقولون استوي بالغلط ماتتصورون حالتي النفسيه كيف لاني الحمل يى في وقت مب صحيح المهم احاول اهدي نفسي واقول هذا رزق من رب العالمين وعموما خوات ريلي كل جمعه ايون بيتنا ويتمون غدي وعشاء وصدقون لاو شو ماعطيناهم يتذمرون مايعجبهم واخر مرة استوت ضرابه بسبه العشاء عشان البشكارة ماكانت امويه حلو المهم يوم كلمت ام زوجي تمت تتحرطم علي ابشكاره واتقول هاي اطور لسانها ومب زينه المشكله لين احينه يبنى 5 بشاكير ومن كل وحده تتشكي ويوم انا اتناقشت وياها اتقولي انا بسير بيت ولدي بيلس انا قلتلها ليش انتي تطلعين هذا بيتج من بيتي انا خلاص تعبت شو اسوي اطلع بيت روحي ولاايلس واتحمل هالتدخلات ارجوكم محتاجه حد ايقولي الحل

صحيح معاناة ... لكن عليك بالصبر أولا والتحلي بالحلم وحسن الخلق ثانيا ...

وياأختي الكريمة :: بصراحة أقولك :




















بس لاتزعلين




مافهمت شي من كلامك .. ممكن تكتبين باللغة العربية يكون أفضل لأنا نبغى نفهم السالفة ونرد عليك


تحياتي ،،،،،،،،،،،،،،،،،

السلام عليكم ورحمة الله وبركاته
اختي فانصيحتي لكي عليك بالصبر حتىتننحل المشاكل بعدين فكري بالطلعه لان طلعتك بدون مشاكل احسن لك ولزوجك

حل هذه المشكلة بيد زوجك يا أختاه وليس بيد غيره فلماذا لايجلس مع اهله ويناقشهم بهدوء
ويحل المشكلة معهم
حاولي مع زوجك بطريقة لبقة أن ينهي الموضوع
وإذا مانفع
سوي اللي عليك ورحبي بهم ولاتردين على إنتقاداتهم ولاتناقشينهم بشيء نهائياً
( حطي إذن طين وإذن عجين )
وإصبري ويفرجها ربك

والله انا رايي انك تقنعين زوجك وتتطلعين بيت بروحك، والاسكان ما تقصر في دبي
والحماة معروفة في كل مكان وما في داعي اتعبين نفسك وتنهارين عشان شي ما يسوى مثل ما قال المثل طنش تعش

اهلين اخت sea_lover مشكلتك صارت مع ناس كثيرين انتى مو اول وحده ولا اخر وحده
اقووووووووووولك انت تستخيرين احسن لك وافضل انك يا تسكنين لحالك افضل لك لاني تكون لك مملكتك الخاصه وزي ما يقووووووووووول المثل خلك بعيد حبك يزيد