السلام عليكم



النهارده بقى عملت لكم كيكه بجد روعه واللي حتجربها حتدعيلي لاني بخش المطبخ 5 دقايق اكون عملتها وحطيتها في الفرن ومعملتش مواعين كتير

وحتى جوزي قاللي الكيكه ده عامله زي كيك الجاتوه :

اولا انا حكتب لكم المقادير لكن انا بعملها بالبركه كده وحقول لكم ده وده

1 كوب سمنه
2 الا ربع كوب دقيق
ربع كوب نشا
3 بيضات
2 معلقه صغيره بيكنج باودر
نص كوب جوز هند
بشر برتقال (تغنى عن الفانيليا)
1 وربع كوب سكر ناعم
كوب الا ربع لبن
1 ملعقه صغيره محسن كيك(مش ضروري)

ده المقادير للي عايزينها بالكوب وبالظبط
اما عن مقاديري انا بقى فعيني ميزاني

1 مغرفه سمنه متعبيه وصايه
2 كوب الا ربع دقيق وربع كوب نشا ولو معندكيش نشا يبقى 2 كوب دقيق
(وخدي بالك الكوبايه اللي هيا مخ الازاز ابو ايد بتاع الشاي العادي الشفاف بس يكون ناشف علشان ميلزقش فيه الدقيق ونضطر نغسله :87
3 بيضات
نص باكو بيكنج باودر
كميه جوز هند ملو ايدي وعليهم شويه صغننين وصايه برضه
بشر برتقاله .. بجيب القشر واحطه في الطاحونه واطحنه(وساعات بحط روح برتقال روعه برضه)
كميه السكر بملى الطاحونه بتاعه الخلاط مرتين سكر واطحنهم وبعدهم بطحن البرتقال واروح شاطفه الطاحونه في ساعتها واسيبها تنشف
اللبن ساعات بحط لبن بورده لو معنديش لبن سايب
معلقه محسن الكيكه باخودها بحرف المعلقه اللي بعمل بيها

كفايا رغي بقى ونيجي للطريقه والصور حتشرح نفسها
اولا ده ادوات الجريمه بس

حطيت السمنه والسكر وانا بستعمل في الحلويات سمنه بلجيكي اسمها فاما قمه في الروعه وفي كحك العيد الكل افتكره جاهز من نعوميته

حنقلبهم مع بعض لحد ما السكر والسمنه يتداخلوا ويندمجوا

حنقلبهم شويه بالمعلقه لحد ما يبقى الخليط كريمي شويه ولونه يفتح

حنحط البيض بيضه ونقلب لحد ما تتجانس مع الخليط ونضيف التانيه ونقلب وهكذا وده صوره اخر بيضه

ونقلبهم كويس وده حيبقى قوام الخليط

حنحط بشر البرتقال ومحسن الكيك

وبالمره حطيت البيكنج باودر

(ملحوظه:كتير منكم حيقول بس المفروض يتحط كذا مع كذا او كذا قبل كذا ..لكن ده طريقتي اللي جربتها ونتيجتها حتشوفوها بنفسكم وعلى راي المثل الشاطره تغزل برجل حماره ... ال يعني الخايبه بتغزل برجل معزه :201
المهم بعدها حطيت جوز الهند والدقيق والنشا

وقلبتهم وكان طبعا قوام اسمنتي
المفروض بقى دلوقتي نحط اللبن شويه شويه مش كله علشان ساعات مش بتحتاج لبن كتير
المهم علشان معنديش لبن سايب فحطيت لبن بودره حوالي معلقتين

وحطيت عليهم نص كوبايه مايه الاول(في المج الازاز اللي عايرت بيه الدقيق)

وقلبت ولقيتها محتاجه شويه كمان حطيت شويه كمان برضه لحد ما نوصل للقوام اللي يتاكل حاف ده

وبعدين نجيب الصينيه وندهنها زبده ودقيق ولازم زبده مش زيت ولا سمنه
وهنا صبيت الخليط وساويته في الصينيه(صينيه مقاس 24 او 26)

وعلى الفرن اللي تكوني مولعاه من اول ما تبتدي تشتغلي فيها وتحطي الرف السلك في النص ويكون الرف الصاج محطوط تحت علشان لو فرنك حامي ميلسعش قعر الكيكه
وعلى حراره 180 ومده التسويه من 30 الى 35 دقيقه وتختبري تسويتها من نص الكيكه اغرسي سكينه ولو طلعت نضيفه تبقى استوت بس انا طبعا مش بعمل كده لاني حفظتها خلاص وبعرفها اول ما بتستوي وبعد ما تطفي عليها تسيبيها 10 دقايق في الفرن وبعد كده ابقى طلعيها تكون بردت شويه
وده صورتها بسم الله ما شاء الله بعد ما طلعت

انا بقى دايما بعد ما اطلعها وهيا سخنه شويه بحط عليها طبقه مربى وارش عليها جوز هند لكن للاسف من كتر ما بعملها المربى خلصت ولسه منزلتش اجيب تاني

وده بقى طبق للي حتجيبلي المربى

وده بقى طبق للي حتجيبلي المربى