السلام عليكم

كيف حالكم شباب وشابات

مادري انا عضو جديد عندكم .. المنتدى جاني من خلال بحثي بالجوجل عن الرجيم

هل هو مسموح لشباب بالتسجيل او مو مسموح .. المهم اني سجلت وقبلتو تسجيلي معكم

وبما اني جالس اسبح واسبح بمنتداكم وشفت رد احد العضوات :

تقول رجيم تمر واللبن << ؟؟ بصراحه استغربت

يعني وشلون تمر ولبن ؟

يعني تخيلوو تمر ولبن ودب ؟ ماتجي ولا بالعقل وقسم

انتم تعرفون السمين لا شاف النعمه قدامه ,, ينعمي ينسى شي اسمه رجيم وينسى كل شي ويرفع كمومه ويمحط بلا رجيم بلا هم ,, بكرى انشاء الله الرجيم

انا صراحه من اول كنت دب .. وكنت كذا لا شفت النعمه قدامي وقسم بالله انعمي مادري من الي قدامي ومن والي بجنبي .. خلاص اجلس اكل اللين تنسد كل الفراغات الي ببطني

---------------

من اول اخوي لا سويت له شي قالي :: انعن شحومك المتراكبه ايها السمين الاجرب << هذي بصراحه تضيق الخلق مره .. لاسمعتها اطلع وادودل ايديني واشغل السياره ومادري وين اروح له

ماسويت رجيم الا عشان هالكلمه الي يرددها لي

طبعاً انا تخلصت من الشحوم بطريقتي الخاصه :

الي يقولي لاتتعشاء والي يقولي لاتاكل رز ولا تاكل شي فيه زيوت

ياناس ماقدر عجزت !

سويت كل الطرق ولا نفع ,, العالم الي حولي ياكلون ويدبجونها واانا خبزه بر وبيض مسلوق

ماش ماينفع ,, لازم الواحد يدبجها اللين تنسد الفراغات


بقولكم كيف تخلصت من شحومي المتراكمه على ماقال اخوي

طبعاً ماشاورت احد ولا ناظرت هالدكاتره ( ماتكولشي الا دجاجه مشويه وخبزه بر وبيز مسلوء ) << يابن الحلال وخر بس

كان وزني 109

ومشيت على هالجدول :

اول شي .. اصحى من النوم واشربلي كاس عصير وعليها الى العشاء .. طبعاً اصحى انا متأخر .. يعني المغرب كذا

لاجاء العشاء وحطت الوالده الصحن قدامي مهما يكون ( رز - مكرونه - نواشف - مشويات ) مره اي شي .. اضربها واضربها اللين تطق كرشتي وتقول ياتركي خلاص روق و هد اللعب ..

واذا خلصت رحت سويت رياضه .. اجلس اركض بهالسير اللين اتعب .. يعني نصف ساعه باليوم بس

وخلاص ما اكل اي شي .. يعني وجبه وحده باليوم ورياضه نصف ساعه ..

والحمد لله الآن وزني 72 .. تخلصت من كل شحومي

من 109 الى 72 << وش رايكم بس ؟ تحسون اني تركي ثاني موب الي على خبركم ذاك ابو شحوم متراكمه

بس فيه مشكله هنا .. الي هو شد الجسم .. انا جسمي احسه بأي لحظه اسمن .. يعني هالمرحله هذي احس انها حساسه .. واحس جسمي فيه حاجات كذا زايده مرتخيه مادري وش تبي هع ..ويبيلي بس نادي شوية شد جسم وابقى 100%

ولاتسمعون الي تقول لبن وتمره .. بس لاتاكلون الا وجبه وحده باليوم <<<<<<<<< هذا الولد بتسطره المشرفه

بصراحه اخوي رجيمك غلط اولا الرجيم هو نمط حياة كامل يمارسه الانسان لمده معينه بهدف الحصول على جسم صحي والوجبه الواحده في اليوم ماتلبي حاجات جسمك من فيتامينات ومعادن و فكرة ادب دب في الاكل واروح اسوي رياضه ذي جديده يعني الي تاكله تحرقه بس ماينقص وزنك بالنسبه هل مسموح تسجيل الشباب او لا بصراحه ما ادري.

كتبت بواسطة تركي ولد ابوه
السلام عليكم


هل هو مسموح لشباب بالتسجيل او مو مسموح .. المهم اني سجلت وقبلتو تسجيلي معكم




اخى فى الله
وعليكم السلام ورحمه الله وبركاته

نعم مسموح بوجود الشباب بيننا فى هذا الركن ولكن بعض الاركان نسائيه غير مسموح بالشباب فيها

ولكن بضوابط تجدها فى قوانين المنتدى بالرابط

مهم قراءته قبل كتابه موضوع ارجو من الجميع الدخول

ومنها

22. يمنع استخدام الوجوه التعبيرية بين الجنسين وذلك لأنه مدخل من مداخل الشيطان.


طبعاً ماشاورت احد ولا ناظرت هالدكاتره ( ماتكولشي الا دجاجه مشويه وخبزه بر وبيز مسلوء ) << يابن الحلال وخر بس


هذه هى المشكله وان لم تحب ان تشاور اطباء وجب عليك ان تقرأ جيدا فى الموضوع لان ما تفعله مضر جدا وكما ذكرت لاكثر من اخ انتم الرجال اى ضرر يقع عليكم انتم فقط اما نحن النساء فالموضوع ممتد الى الاجيال التى سوف ننجبها فالقصه مضاعفه فى حالنا نحن



اول شي .. اصحى من النوم واشربلي كاس عصير وعليها الى العشاء .. طبعاً اصحى انا متأخر .. يعني المغرب كذا

لاجاء العشاء وحطت الوالده الصحن قدامي مهما يكون ( رز - مكرونه - نواشف - مشويات ) مره اي شي .. اضربها واضربها اللين تطق كرشتي وتقول ياتركي خلاص روق و هد اللعب ..

واذا خلصت رحت سويت رياضه .. اجلس اركض بهالسير اللين اتعب .. يعني نصف ساعه باليوم بس

وخلاص ما اكل اي شي .. يعني وجبه وحده باليوم ورياضه نصف ساعه ..


اين الاكل انت ببساطه اخضعت نفسك الى حاله من التجويع وليس نظام غذائى صحى
وعموما مبروك النزول
لكن لا ينفع مع النساء ابدا

ههههههههههههههههههههههههههههههههههههههه
تركي الله يرجك
<------ ماتت ضحك
المهم اسمع يا اخوي
ريجيمك ما راح اقول غلط لانك تدري انه غلط
انا مرات لما اكل وجبة باليوم احس بتانيب الضمير فحاول اكل وجبتين
لكن على قولة اختي وحيدة اهلها انه لازم تتعود على نظام جديد
لان لو ترجع لنظامك السابق راح ترجع تسمن
فانتبه لنفسك زين ولازم تسوي رياضة شد
وشكرا انك شاركتنا بتجربتك الشخصيه
لانها تدعمنا نحن اصحاب الوزن الثقيل

مبروك النزول ونظامك حلو

والي اوزانهم كبيره لازم يحرم نفسه اول

وبعدين لاحق يخلي اكله صحي

واعتقد كذا افضل واذا بخلي اكلي صحي وادور على فيتامينات وتخفيف ماراح انحف لو 10 سنين قدام

واخوي اذا على الترهلات استخدم كريمات الشد او خل التفاح على الجسم

وسوي رياضة شد او صقل للجسم والأيروبيك بنادي وعلى يد مدربين

موفقـ

كاااان زين لوو كنت اناا مثلك

ع الاقل صحي او مب صحي انت ضعفت

بس اناا سووويت وسويت واضعف ورد اسمن

وعلى فكره(( ترى جربت رجيم التمر واللبن )) بس والله حلووو

وضعفت عليه حييييييييييييييييل بس جاا رمضااان خرب كل شي

مبروووك عليك النزووول والوزن الجديد

تحياااتي لك

اول شي السلام عليكم ورحمة الله وبركاته
الموضوع رائع وانا من البدناء السابقين اسمعوا قصتي طبعا قصتي نشرتها على الانترنت والقصه بالتفصيل طبعا انا من الامارات وعمري وقت الحالي 24 سنه وبديت الرجيم والرياضه وانا في عمر 22 سنه اسمعوا القصه الحزينه كان وزني 210 كيلو الصراحه كنت اشوف نفسي من امتن واحد في الشارجه اي واحد يشوفني يستغرب يقول هذا من وين يقول هذا منا وفينا ولا شو المهم كنت من البدناء يعني كنت متين وايد طبعا نحن بالوراثه امي الله يخليها متينه وايد وابويه اضعيف ونحن في البيت كلنا طلعنا على امي معناه مش انا الوحيد المتين عندي اخواني واخواتي نفس الشي المهم كنت في صغري اشوف ربعي يطلعون سناتر وحدائق والمولات والبحر وكل مابي اطلع وياهم مايزكروني للاسف اونه فضيحه لاني الفت النظر كنت اروح السينما روحي وروح الحدائق روحي وكل مكان روحي ما كان ايون وياي الا يوم على احسابي مثلا السينما اذا على احسابي ايجون وياي والله تعبت وايد من اساليب ربعي ما كانوا يركبوني سياراتهم ولا كان التكسي يوقف حكي والله مره ركبت في سيارة اربيعي بالغلط لان انحرج وانجبر يركبني لان كانوا الشباب وياي وكان يبا ياخذهم وانجبر ياخذني اول ما ركبت السياره قالي اشويشوي الله يخليك الجانبين والله تعرفون هاي الكلمه اجرحتني والله هاك اليوم يوم سرت البيت صحت وايد قلت ليش انا جي ليش طبعا هذا شي عادي الواحد يوم يظايج يمكن يعاتب نفسه ويمكن يقول ليش وليش ولو ولو المهم هذا الموقف واحد من المواقف والموقف الثاني كنا جالسين في بيت واحد من الربع ومادري كيف واحد من الشباب قال شو رايكم انروح راس الخيمه عند افلان المهم انا فرحت قلت عن الملل خلنا انروح وفجاه صاحب السيارة يعطيني في وجهي يقولي جمعه اسمحلي ماشي مكان ليش ماشي مكان وش معنا انا الضحيه ليش غيري لا والله صدقوني كلامه جرحني وايد المهم راحوا يستمتعون وانا رحت البيت اصيح نفس كل مره قلت لي متى والله احتاريت من ربعي ومن كل شي والله صدقوني مره سرت ميغي مول في الشارقه شفت الناس اتلاحكني وتضحك علي قلت انا اشلي في الناس لكن والله ما قدرت انحرجت قلت شو ماشافوا انسان امتين المهم انعزلت عن الناس قلت انعزل احسلي لا ربعي يرحموني ولا الناس كل ماروح افصل كندوره الي في المحل يضحكون علي ارباب 9 ونص وار قلت حتى هذا لاحولوه ولا قوه شو الحل من ها الناس ما اقدر اتنفس كل ماروح مكان يستويلي موقف ولي متى المهم سرت عند امي قتلها امي الناس تضحك علي علشان انا متين قالت بالعكس ولدي انت اضعيف وما فيك شي وما عليك من كلام الناس لان كلام الناس وايد قلت صحيح ومرت الايام ودخلنا رمضان شهر الفضيله قلت ياه يانا رمضان الشباب يحبون يلعبون كورة الطائره وانا وياهم بس ياترى بلعبوني ولاكيف المهم رابع يوم رمضان الشباب سارو على البحر وانا وياهم علشان نلعب الطايره طبعا في سيارتي الوالد رحمه الله اشترالي سياره بعد ما ذقت المر والمذله والحمدالله المهم يا وقت اللعب تحدي ويا فريق اخر يعني ناس ثانيين المهم اتريا مليت قلت ها ادخل العب قالوا اصبر اشوي وانا على احر من الجمر ماعني متين بس كنت احب ابين نفسي اضعيف بعد طول انتظار قالولي جدام الشباب وانت صدقت من لعبك زعلت وركبت السياره ورحت واصيح قلت ياجمعه لي متى بتم جي شو الحل ياربي المهم انا ماكنت اعرف وزني كم بالضبط ولكن اعرف ان وايد قلت بروح اشوف كم وزني سرت الصيدليه قال ابوي هذا الوزن مايشيلك المهم ركبت فوق الوزن خذا دوره ونص قلت الله يهديك الميزان خربان قال الميزان مش خربان هذا انت الي خربت الميزان كان الميزان حده 140 في واحد من الاصدقاء وياي اوكيه مثل مايقولون الروح بالروح حبوب الله يحفظه المهم اتصلتله قتله وين شي ميزان يشيل الاوزان الكبيره قال شي في الجمعيه ميزان الكتروني يمكن ينفعك سرت الجمعيه وركبت الميزان ولا المصيبه الوزن فوق الخيال قلت مستحيل ماصدقت قلت اكيد الميزان خربان وزني 210 لا لا مايصير مافي انسان وزنه 210 على نياتي مادري ان برع ناس مادقدر تمشي والسبه اوزانهم المهم سرت جمعيه ثانيه وثالثه قلت والله الوزن صحيح وانا يوم اشوف نفسي في المنظره اشوف واحد متين ولكن مش لهدرجه 210 المهم سويت رجيم يومين وتركته مليت قلت الله رايدلي جي خلاص بتم جي ماشي فايده المهم بعد فتره اشتغلت في جوازات الشارقه وربعي كانوا يقلون شو حياتك انت منو بيشغلك ومنوا بتاخذك قلت هذا نصيب الارزاق عند الله وسبحان الله واشتغلت ومرت السنين طبعا انا اشتغلت وانا عمري 18 سنه ومرت السنين وكل يوم يحصلي موقف في الدوام طبعا انتوا ممكن اتقولون هذا مش متن هذا كله استوالك نعم هذا كله استوالي عفوا ماحد من اخواتي تزعل علي حتى البنات كانن يتمصخرن علي في العمل والشباب نفس الشي قلت يمكن انا مافيني شخصيه بس في النهايه قلت لا ياجمعه هذا مومنك من المتن وتميت الووم نفسي هاي السنين كلها المهم لما ياني يوم قلت ليش ما احاول اسوي رجيم ورياضه كلمت اربيعي العزيز علي الله يخليه وما انسى نصايحه لي ووقفته وياي وفتحتله الموضوع قتله شو رايك اضعف قالي غريبه شو الي خلاك تفكر في انك تضعف قتله وليش لا الكل يتمصخر علي ويقول انت امنو بترضى فيك وانت كذا وكذا قال كلامك سليم وانا وياك في كل خطوه وسرت البيت قلت من باجر انا مش جمعه اذا كلت انا مش ولد امي اذا كلت انا كذا وكذا تميت اقيد نفسي علشان ادخل جامد المهم وبديت الرجيم اول يوم نفس المينون وتحملت كنت اكل ثلاث صحون ناشف من الكبار زائد صحن معكرونه زائد صحن بيض طماط نعم كنت اكل هذا كله هذا كان اريوكي والغدا كان صحنين عيش لحم او دياي ماكنت احب السمك نهائيا والعشاء 12 شورما سبع لحم وخمس دجاج زائد فلافل وكبه واثنين بيبسي وواحد ماي كبير هذا كان اكلي قبل الرجيم وهذا من غير المقبلات ومن غير الشوكلاته وغير الاوقات ما بين الغداء والعشاء المهم كيف كان رجيمي الصبح صحن ناشف مش ثلاث والغدا صحن برياني والعشاء 4 سندوشات من غير رياضه طبعا انا ما اقدر ادخل رجيم نفس الي اوزانهم 140 وتحت يعني خبز اسمر وغيره لا كنت ما اقدر على الرجيم الي سويته المهم في بعض الشباب كانوا يقولون مستحليل انك تضعف جان شعبان ضعف جان شحمان ضعف طبعا انا كنت من مستواهم لا تستغربون نعم كنت من مستواهم ويمكن اخس المهم اربيعي العزيز الصديق الوفي قالي ياجمعه في الدنيا الانسان يصابر قتله كيف يعني انا مافهمت قال جمعه مافي شي صعب يمكن مستحيل ولكن مش صعب قتله ما فهمت قال الي اتزوج احسن عنك قالي الي درس وخذا شهاده احسن عنك قتله لا طبعا قالي المساله اراده وعزيمه والتوفيق من رب العلمين قبل ما اضعف قتله صدقني اذا ضعفت بادخل الشرطه قالي ليش لا تقدر بالعزيمه والاصرار قلت هذا هو الكلام وبديت المشوار وسرت مركز الدكتور نيوترشن سرت وكان وزني 201 طبعا انا سرت بعد ما عملت رجيم خلال شهر المهم وتابعت رجيم نيوترشن زائد حبوب اعشاب طبيعيه ويا اخواني وياخواتي وبعد سبع شهور نزلت 57 كيلو حطو اسمي في المجلات والجرايد والصحه والطب خلال 6 شهور باسم جمعه احمد الحوسني الذي يعمل في جوازات الشارقه وباشرت وكان املي في الله كبير لدرجه فنشت من العمل علشان اكرز وقتي كله حك جسمي وخلال سنه وشهرين نزلت 100 كليو واستمريت والمركز عرضوا علي اني اطلع في التلفزيون وفي الراديو وبعد سنتين ونصف كم تتوقعون هاذي المعاناة والصبر والاصرار والعزيمه والشباب وربعي والناس اليوم اخوكم وزنه ما شاء الله اللهم لاحسد اللهم اني لا افتخر ولكن لاجل الذين في نفس مشكلتي السابقه الوزن 88 كيلو والطول 183 شوفوا الاراده شو تسوي شوفوا العزيمه خلوكم جي كم بتتعبون شهر شهرين صدقوني بتمر الايام المهم انا خضعت لعمليات شد ترهلات في مركز الملوك الطبي في الشارقه بعد ما نزلت الوزن تمت شوي ترهلات والحمدالله اليوم اشتغل في شرطة الشارقه عهد قطعته اذا ضعفت بدخل الشرطه سبحان الله اذا انا روحي مامصدق سبحان الله اللهم للك الحمد اتمنى اخواني واخواتي انكم تتحملون وتصبرون والله اني حصلتلي ضروف ماديه وصحيه ومطبات ولكن الله شاهد استمريت وكنت اصيح من الجوع الناس في الكافتيريا والمطاعم وانا زعتر ولبن اب وخبز اسمر اتحملت والله علشان ابين ان ما في حد احسن عن حد مش بس في الوزن في كل شي مش شرط انك تتطلع الاول ولكن الشرط انك تنجح واليوم انا على وشك الزواج دعواتكم ومشكورين على المرور