مرحبا .. اشلونكم ان شاء الله مستانسين
كل المحاولت اللي سويتها للأسف افشلت
نسخت طرق الأطباق الحلوة اللي كتبتها بعض الأخوات والله مشكورين وايد وايـــد
وسويتها في الوورد بشكل حلو .. وملون وحركات
ولصقتها على البيبان وفي حجر النوم وفي المطبخ على الدولاب وعلى الثلاجة
ومليت غرفة امي من هالاوراق
وحطيت في شنطتها منها
لكن لا حياة لمن تنادي
خواتي مو مهتمين وامي مطنشه
وحدة تقول لي الله يشفيك
والثانية تقول منت بصاحي

يــــــــــــــــــايــــــــمــــــــه
انا مليت من اكل سنتدوتش التونه
او سنتدوتش الجبنة البيضاء
وش ذنبي اذا كنت تبين تسوين رجيم وش ذنبي
وما ابي اكل من المطعم

اقول ياليتكم جيرانا ومستعد اجيب لكم اللي تبون من الطلبات
بس كل يوم تسون لي حلو وطبخة محترمة
يا ليت

يوسف لين متى وانت تقول ليت
إلا ليت وليت وليت هاه

بسم الله الرحمن الرحيم
أخي يوسف ...

يمكنك أن تكسب أهلك بالكلمة الطيبة ، والعمل الطيب ...
وصدقني بأنك لو أحسنت عملك لله ، فإن الله سوف يجعل لك مخرجاً ... و أمور الطعام وغيرها هي أمور نفعلها لكي نعيش لا أن نعيش لنفعلها ... بالله عليك وكن صادقاً في قولك .. هل تحرص على صلاتك مثل حرصك على الطعام ..؟؟!!
يا أخي الفاضل ، إن ملء المعده أمر سهل جداً ، لكن ملء القلب بحب الله هو المهم بل الأهم ...
قبل أن تطلب من أحد من أهلك إعداد الطعام لك ، قم بالمبادرة معهم بالكلمة الطيبة ، دعهم يلتمسون الصدق في كلامك ، فبعض الأخوات لا يقمن بواجبات الإخ طالما رأينه مقصر في واجباته نحو ربه ، وأنت عليك أن تغير من نمط حياتك كلها من الألف إلى الياء ...
عندما صليت العشاء في وقتها ثم تبعتها بالسنه ... ماذا أحسست عندها .؟؟؟ ألم تأتيك الطمأنينة والراحه .؟؟!! ألم تشعر بأنك مع الله وأن الله معك ..!
إذن يا أخي الكريم ، تذكر قبل أن تبدأ بأي أمر من أمور الدنيا ، هل أنت بالفعل قمت بالبدء في أمر من أمور الآخره أم ماذا .؟؟
و إجعل ذكر الله دائماً على لسانك ، في كلامك ، في حروفك ، وحتى في كتاباتك , فدعوتك لغيرك بالهداية والخير ، إنما هي دعوة لك بالهداية والخير ...
و إذا أردت نصيحتي ، في عمل توقيع لك ، فإجعل توقيعك يحمل (( سبحان الله و بحمده ، سبحان الله العظيم )) ... فلو تعلم يا أخي المسلم كم لهذه الكلمات من وزن في الميزان ... لما نطقت غيرهم أبداً ... يكفي أنها تنجي صاحبها من النار إن قالها في اليوم مئة مره ...
و قد أرفقت لك برابط فيه صورة إجعلها على سطح المكتب لجهازك ، حتى تنطقها كلما فتحت الكمبيوتر ...
....

جزاك الله ألف خير ... و تذكر ... لا تصاحب أصدقاء السوء فإنهم والله لن ينفعوك أبداً ...

ولكم تحياتي .http://lakii.com/vb/showthread.php?s=&threadid=9579

اختي الغالية زوزو
كلامك والله وايد مؤثر انا شاكر لك
صدقتي لما صليت العشاء بوقته وصليت بعده السنة حسيت براحة
كان الوقت بعده فيه بركه عكس باقي الايام
بس انتي ما تعرفين اهلي
كل واحد مشغول بروحه ما في احد منتبهلي
اكلت يا عيون امك عسى ثيابك مكوية عسى ما تاخرت على المدرسة
يا حسرة ماقد سمعت امي تقول لي مثل هذا الكلام
اذا طلبت شيء قالت خذ هاذي الفلوس خذ فيها اللي تبي وفكني من شرك
وخواتي 5 بالبيت يا حافظ
لكن ما ادري وش لون عايشين
انا ما ادري وش لون احكي لك عن اهلي ما بخلص
ياليت عندي اخ يمكن كان يهون الأمر
اقعد انا وياه ونلعب كورة ووووو
الله يسامح امي .. استغفر الله اهي ما لها ذنب
الولد والبنت من الله
خواتي طال عمرك اللي تبين اني اتعامل معاهم بالطيب تراهم يدلعون علي
ثنتين اكبر مني وحدة بس تقرا ولا نايمه والثانية
آه منها عندها هذي الايام عزلة ( بس لا تعلمين احد ) الله يستر
وانا نفسي اعرف وش فيها ما تقعد معانا ولا تتكلم معانا ولا تاكل معانا سندوتش تونه
ولا شيء بالمره يمكن لها شهر علميني كيف اقدر اكلمها
او اكتب لها رساله ما ادري كيف الطريقة
وثنتين اصغر مني ما يعرفون غير روح جيب لنا بطاطس مقليه من عند عم بو سعد
روح جيب ببسي واذا ما سمعت كلامهم يروحون يفتنون علي عند امي
وامي تنصرهم علي
لانها تسمع من طرف واحد
ارجو من جميع الامهات انهم يسمعون من الطرفين عشان ما يظلمون احد

اختي الغالية
آسف على الاطاله
بس والله كلامك وقع له تاثير في نفسي
وان شاء الله اعلمك بالاخبار او باول
ترى انا اليوم وامس ما فتحت الشات والله العظيم

إلى الأخ يوسف ..
لا أستطيع أن أقول لك أكثر مما قلن لك الأخوات بارك الله فيهن ..عليك أن تشغل وقتك فيما ينفع آخرتك .. واجعل الله نصب عينيك .. احرص على أن تجعل لك ورد للقرآن كل يوم تقرأ مثلا صفحه أو صفحتين .. ردد دوماً ( سبحان الله وبحمده .. سبحان الله العظيم ) فهي كما قال عنها النبي صلى الله عليه وسلم ( كلمتان خفيفتان على اللسان ثقيلتان في الميزان حبيبتان إلى الرحمن )
وأنصحك أخي بأن تكون مع الصحبه الصالحه .. وملازمة المشايخ وطلبة العلم .. كن مع الصالحين في حلهم وترحالهم .. سوف تجد متعه وعباده معهم .
أما بالنسبه لأخواتك أحسن إليهم وتودد لهم وفاجئهم بالهدايا الطيبه وعبرلهم كم أنت محظوظ بهم ..
ولأمك أحسن إليها وإن لم تعبرك فهي لها حق الصحبه أولا وأخيراً .. قبل رأسها بحنان والزم رجليها فكما قال النبي صلى الله عليه وسلم ( إلزم رجلها قثم الجنه ) .. قل لها قبل أن تخرج
( أريد رضاك يا أماه .. هل توصيني بشيء ؟؟ هل تحتاجين شيئاً ) تعامل مع أهلك وأخواتك كأنك رب الأسره , لا في السلطه ولكن بالموده والإحترام .. إن جميع هذه الأمور بيدك أنت لا بيد أحد يخبرهم بأن يحترموك أو يقدروك .. تصور يا أخي أنك متزوج ولديك بنات .. كيف ستكون معاملتك لهم ؟؟ عليك بالكلمه الطيبه للجميع ..
وكما قال أحد الشعراء في أبيات جميلة رائعه .. يقول فيها :
أحسن إلى الناس تستعبد قلوبهم ** ** فطالما استعبد الانسان إحسان
واشدد يديك بحبل الله معتصما ** ** فإنه الركن إن خانتك أركان
ويقول الشافعي :
الناس بالناس مادام الحياة بهم ** ** والسعد لاشك تارات وهبات
وأفضل الناس ما بين الورى رجل ** ** تقضى على يده للناس حاجات
لا تمنعن يد المعروف عن أحد ** ** إذا كنت مقتدراً فالسعد تارات
قد مات أقوام وماماتت مكارمهم ** ** وعاش أقوام وهم في الناس أموات
وفقنا الله وإياك إلى العمل الصالح وكل ما يحبه الله ويرضاه .. وإصلح الله الجميع وهداهم إلى سواء السبيل

مرحبا وأهلا بك اختي the blue sea
شكرا على ما كتبت لي هنا
لقد بدأت بمجاهدة نفسي على الصلاة في المسجد
وعلى صلاة السنة .. ما عدا سنة الظهر .. بصراحه احسها ثقيلة جدا .. اللهم سامحني
ويجيني الشيطان بمليون فكرة وفكرة عشان اصلي الظهر وبس
وأحيانا أطيعه وبعدين أندم
ومن يوم صرت اصلي في المسجد شفت اشياء وتعرفت على جيران يسكنون جنبنا من زمان
واحد يقول لي ما شاء الله عليك والله كبرت صرت رجال من متى وانت تصلي معانا
ما قد شفتك يالله الله يوفقك
وشفت واحد رجال أعمى بعد ما خلصت الصلاة طلع بروحه وراح البيت وفتح الباب بمفتاحه وانا واقف اناظر فيه ماحد ساعده سبحان الله ومر علي واحد عرف نفسه وطلع ولد جيراننا القريبين لكن ما عجبني لأنه كان يلعن وسالته عن الرجال الاعمى قال هذا من جيران المسجد من زمان وحنا نعرفه معقوله انت ما تعرفه
لا والله ما اعرفه ولا اعرفك ولا اعرف احد موليه
واحسن واحد تعرفت عليه من جيراننا القريبين واحد عزوبي متزوج وزوجته عند اهلها نفاس يابتله بنيه سماها ريم
دمه خفيف وكلامه وايد حلو
يقول لي يالله ما ابيك تتاخر عن المسجد
والا بدق عليك وازعجك
مشكلتي اني احب القعدة بالبيت
وعمري ما اختلطت باحد
وما عندي اصحاب غير اصحاب النت
عشان هم ما يعرفوني




لاني




شخصيتي ضعيفة واستحي واتلخبط بالكلام

انا ما كنت باقول لكم لكن قلت الحين

اهلك مايبونك تخسرهم وتتعبهم ولذلك طنشوك