شجعتني الاخت (عطر الليل) على شن حملة نظافة عالى البيت وهذة تفاصيل (حملتي.. وبكاء طفلتي)يوم الاربعاء يوم صليت الفجر قلت ماني نايمه وبابدا لكن للاسف كتاكيتي صحوا وولدييبكي بس ماهو شئ جديد..وبنتي اسم الله عليها ساكته ..كنت بابدا بالمجلس بس قلت بخليهم لين ينامون ورحت لغرفة النوم وغسلت البطاطين (غسالتي كبيرة تشيلها) والشراشف والمفارش وكنت مرتبة الدولاب الاثنين بالليل حطيت ملابس الشتاء بشنطة وحطيتها تحت السرير ورتبته يعني اليوم بس مسحته من برا ورحت للتسريحة ورتبتها من جوا ومسحتها من برا وكذالك الكومدينا..كتاكيتي ماناموا قلت بابدا بالمجلس حتى لو مانامو(وياليتني مابديت) قلت ابغى اطلع الكنب برا وبغسل السراميك ..بعدين قلت بس ثقيييييل..وانا لحالي ..وبدا يتسرب الحماس.. ولاني لابسه بامبرز بحواجز مطاطية تمنع التسرب ..قلت لااااا بطلعه وبديت اطلع الكنب للصالة ..شوي وقامت بنتي تبكي رحت اسكتها ..ورجعت اكمل وولدي عاجبه الوضعوينقز(يقفز بالعربية) من كنب لكنب.. طلعت الكنب بعد ماطلعت روحي..وطلعت الستائر وغسلتها ..وطلعت الفلتر حق المكيف وغسلته.. وكان ودي اطلع الطاقة(الشباك) واغسلها بالحمام بس البيت عالشارع ومرة كاشف بطلت وبس مسحته .. وجمعت اشجار الزينه وحطيتها بالحمام وغسلتها بالشطاف اسهل من مسحه وانظف صار الحمام غابة..غسلت السراميك ومسحته وولدي يساعدني بمساعدات غير مرغوب فيها ابدا..رجعت بنتي تبكي قلت اليوم يا انا يانتي لازم انومها ويوم بدت تنعس وتنام جاء ولدي يسوي نفسه( جرو) فوق راسها.. عاد قامت ..واخذ نصيبه من الضرب..ورجعت ونامت.. حصلت ولدي يتفرج تيليتا بيز..وبديت ارجع الكنب ..انتبه ولدي وبدا واي كنب يمر من قدامه لازم يطلع عليه او اذا حس ان هذا الكنب جاء دورة في السحب جلس عليها وانا ..المهم خلصت المجلس بعد جهدا جهيد..رحت للغابة وقلت يالا كل شجرة تروح مكانها.. المقلط فيه كنب و اثاث قديم ناوين نوده الجمعية الخيرية بس مدري متى..يعني ماجيته ولا طالعت فيه .. كنت بابدا بالصالة قلت والله ما المسها لين ينامون الكتاكيت..ورحت ابخر المجلس وطلعت الشراشف من النشافه والبطاطين وديتها لغرفة النوم وفرشتها..ابشركم الكتاكيت نامواالساعة يمكن 11 وبديت بالصالة قلت ماراح اطلع الكنب اخذت علقة من المجلس بس كنستها ودخلت المكنسة من تحت الكنب ودعكت الفراش( من شهر ناويه ادعكة)..ثم رتبت المكتبة ومسحتها وغيرت اماكن بعض التحف وكذالك (الله يكرمكم)الجزامة ..ثم بخرت وصليت الظهر ورحت انام مع الكتاكيت ..صحيت المغرب ورحت للحمامات اول شئ طلعت الرف وصلحت له صيانة( الاغراض اللي فيه بس تطيح) وغسلته ورتبت الاغراض اللي فيه( من زمااان بسويها) ..غسلت الجدران بالكلوركس والصابون بالمكنسه الطويلة..ودعكت البانيو والكرسي ومسحته وغسلت المناشف ..ورجعت كل شئ مكانه..ئ وطلعت للحمام الثاني ونفس الشئ..رحت لغرفة الكمبيوتر عاد هذة الغرفة مليانة اشياء قديييييمة مالها داعي ولا نستعملها من زمان( راديو قديييم-فيديو خربان- كاميرا قديمة اسلاك وتوصيلات ..وغيرها الكثير ) بس اذا قلت بنرميها الهزبند يقول لا ويعصب.. المهم رتبت الدولاب وتخلصت من بعض الاشياء بالدس ..ومسحت المكتبة والمكوى.. مجلس الحريم مافبه شئ يعني (اصلع) نبغى ناثثه بس مدري متى ..بس عاد ريحني ماهو مثل مجلس الرجال .. كنست البيت كله.. وجينا للمطبخ حطيت في بخاخ خل ابيض وليمون وماء وبديت امسح الجدران انتبهت بنتي انها طولت مابكت قامت تبكي رحت اسكتها ..رجعت اكمل وكملت مسح الجدران بس بصراحة مااعجبتني الريحة غيرته بمطهر وماء وبديت امسح الدولاب بالدور..اول شي درج الضيوف بس مسحته من برا واللي جنبه بعد للضيوف وبعد بس مسحته..اللي تحته فيه القدور رتبتها ..ومسحته اللي فوقة للخلاط والاجهزة الاخرى مسحت الاجهزة ومسحته من برا..وصلنا للفرن غيرت القصدير ومسحت العيون ومسحته..الفرن قبل كم يوم بخيت فيه منظف افران ومسحته يعني مايحتاج اليوم بس مسحته..اللي فوقه درج البهارات طلعتها كلها وتخلصت من نصها ومسحت الدرج من جوا ورجعت البهارات بعد مامسحتها..ورتبتها ومسحت من برا وصلنا للمكرويف طلعت صحنه وغسلته..ومحته من جوا وبرا..الدرج اللي فوقه (دوختكم) الصحون مسحته ورتبتها ومسحته من برا اللي جنبه درج المناديل والمواد البلاستك (سفر-كاسات-صحون)رتبتها ومسحته من برا ..اللي تحته فاضي ..وصلنا للبقالة قصدي درج المواد الغذائية رتبتها وتخلصت من بعضها..ومسحته من برا ..وصلنا لدروج السحب رتبتها درج درج ومسحتها من برا ..وصلنا للبرادة مسحتها ..جينا للمجلى(المغسلة)غسلت شبك المواعين وغسلت المجلى بالصابون والكلوركس اللي تحته درج مواد التنظيف رتبتها ومسحته من جوا وبرا ..وصلنا الثلاجة فصلتها وطلعت كل اللي فيها وغسلت رفوفها ودروجها والفريزر بس مسحته بعدين مسحتها من برا ..بعدين طلعت على طاولة الطعام ومسحت المروحة..طلعت الطاولة وكراسيها وكنست المطبخ ومسحت الارضية..ثم رجعت الطاولة..وخلصت.. وانا طالعة سمعت احد يناديني واذا به المطبخ قال لي ما عليش تعبتك..قلت لا لا عادي.. ويوم طلعت ولا التصفيييير والتصفيييييق والوروووود..(غرف البيت)..قلت لا داعي لاداعي..هذا واجبي وانت بيتي ومملكتي الصغيرة واذا مانظفتكوا مين ينظفكم؟!!! هذة تفاصيل حملتي والعاقبه لديكم بالمسرات..قصدي بالحملات..بس نصيحة اذا بتشتغلين شغل جامد تخلصي من اولادك..خليهم عند اهلك..او نوميهم..او اذبحيهم..المهم صرفيهم ..والا ترى بيخربون عليك المتعة ويقطعون عنك الاندماج والانخراط في العمل يعني انا يمديني خلصت بدري لو كانو نايمين

السلام عليكم ...
تهانينابالبيت الجميل ثمره الجهدوالتعب...
(لما وصلت لاخر سطر حسيت جسمي تعبان اندمجت وياترتيبك)
انادائما افضل تكون في خطه مسبقه للعمل خاصه لو جود اطفال حتى لانتعبهم ويانا....و ربنا يوفقك

ماشاء الله

ايه كل ده ربنا يعينك

وعقبال بقيت حملات المنتدي

الله يديك العافيه شغل البيت ممل بصراحه وما ينتهى

الله يعطيك العافية تسلم أياديك من شدة حماسي مع المسح و التنظيف و الترتيب
شميت ريحة البيت على العموم أنا رح أزورك عما قريب يعني لاتحوسينه..

علم بلادي تسلمين عالمرور وفعلا لابد من خطة مسبقة
دعوة للتفاؤل الله يعطيك العافية
yakin شغل البيت ممل بس احيانا احس انه متعة
*123* الله يعافيك ..وتشرفين في اي وقت واذا انحاس نرجع ننظفة لعيونك..(كأني عرفتك)

صدقيني يا اختي ما في احلى من الأ حساس بالنظافة لكن ست البيت الشاطرة هي تنظف البيت وتحاول ان تحافظ على تلك النظافة اطول وقت ممكن حتى لايعود كما كان ....