السلام عليكم ورحمة الله وبركاته
هذى اول مشاركة ليا فى قسم الامومة والطفوله و بارك الله فى كل من شارك فيه لانى حسيت انه ملئ بالنصائح والتجارب اللى تفيد كل ام تواجهها اى مشكلة فى تربية ابنائها او فى مرضهم وبارك الله فى مجهودكم وجعله فى ميزان حسناتكم
وحبيت انى نقوللكم على تجربتى فى فطم بناتى
اولا وقبل كل شي حبيت انى نقول انى ولله الحمد اقوم بارضاع اطفالى رضاعة طبيعية ولا عمرى استعملت الحليب الصناعى
وهذى تجربتى فى فطم بناتى
بنتى الاولى استغليت فترة زيارة اخوات زوجى لنا ومعهم اطفالهم وكانت زيارتهم لثلاثة ايام فحسيت انها افضل فرصة لفطم بنوتى
وصيت اخوات زوجى انهم ياخذوا بنتى مع بناتهم باش تلعب معاهم ولانى كنت نسكن فوق بيت اهل زوجى كنت الصبح نرضعها وبعدين انزلها تلعب مع البنات ووصيت عماتها بانهم مايركبوهاليش الا بعد الظهر باش نعطيها رضعه وبعدين ينزلوها يعنى انى كنت ننقص عليها فى الرضاعة لانى ماكنتش مقتنعه انى نحرمها مرة واحدة يعنى حبيت انى ننقص الرضاعة تدريجيا
والحمد لله ولان فى من تلعب معاه ماكانتش تدور فيا وفات اليوم الاول على خير وطبعا فى الليل كنت من الاول منقصتها ونطعى فيها فى رضعه واحدة بس
وجى اليوم الثانى ورضعتها رضعة الصبح ونزلتها ووصيتهم مايركبوهاليش الا فى الليل ولله الحمد لهت مع الصغار وطبعا عماتها كانوا مهتمين بيها من ناحية الاكل والشرب يعنى كل شويا يسقوها امية باش ماتعطشش وتفقدنى ورضعتها رضعة الليل بس يعنى خذت رضعتين بس وفات اليوم الثانى على خير
وفى اليوم الثالث نزلتها بدون رضعة الصبح وطبعا فطرتها ووصيتهم يزيدوا يوكلوها ومايركبوهاليش بكل الا فى الليل ولهت مع الصغار وبارك الله فى عماتها اهتموا بيها وركبوها فى الليل ورضعتها رضعة الليل بس
وبعدين رابع يوم كانو روحوا لبيوتهم ففضلتى رضعة الليل بس قعدت كل شويا نسقى فيها فى ميه وعصاير ونعطى فيها فى حاجة تاكلها وطبعا حاولت انها ترضع بس كانت شبه ناسيتها بمجرد منحسها تحاول تطلب الرضاعة نلهيها باى شي فتنسي وتلهى لين جى الليل سقيتها مية قبل ماترقد ووقت ماناضت تبى ترضع مابيتش نعطيها بكت شويا واستسلمت للنوم ونست ومافات الاسبوع الا وكانت نست الرضاعة نهائيا
والحمد لله ماتعبتش فى فطمها ابدا وكان الفضل طبعا لعماتها وجدتها اللى اهتموا بيها وهيا كانت فى نفس الوقت تحب بنات عماتها وتنسى كل شي لما يكونوا موجودين
وانى اصلا فكرة انى نبعد بنتى عندى لما نبى نفطمها كنت مستبعدتها نهائيا لانى حسيتها قسوة عليها اولا نحرمها من الرضاعة وثانيا تنحرم من امها

اما بنتى الثانية وقت ماقربت تسكر العامين كنا تركنا بلدنا وسافرنا وماكنش عندى حد تلهى معاه ففكرت انى ننقص عليها الرضاعة تدريجيا كل يوم شويا ونلهيها باى شي
وفعلا بديت معاها ومش كل ماتطلب ترضع نعطيها وفى نفس الوقت كنت كل شويا يا اما نعطيها عصائر يا ميه
وفعلا بدت تنسى تدريجيا وفى الليل حتى هوا كنت نقص تدريجيا وكنت نحاول انى نوكلها كويس
وكانت كل ماتصر انها ترضع وتبدى تبى تعيط نحطيعا شوكلاته قطعه صغيرة جدا نسيها بيها الرضاعة عارفة انكم حتقولوا غلط بس انى كنت مانبيش نقوللها لا مافيش رضاعة لانى مانبيش نقسى عليها ومانبيش نبينلها انى نبى نمنعها من الرضاعة كنت نقوللها حااااااااضر نعطيك تشوكليت وبعدين ترضعى وكانت تفرح بالشوكلاته وتنسى (وكنت نقول فى نفسي زى مانسيتها فى الرضاعة حنسيها الشوكلاته وفعلا توا معاش تاكل فيها الا مرة فى اليوم او كل يومين مرة وقطعه صغيرة بس) واستمريت هكى لين نست الرضاعة فى النهار وبعدين قعدتلى رضعة الليل بعد مانست الرضاعة فى النهار قررت انى معاش نرضعها فى الليل هيا ليلة بس بكت فيها وثانى يوم صبحت ناسية الرضاعة والحمد لله وحتى هيا خذت اسبوع بس فى فطمها
هذى تجربتى مع بناتى فى الفطام
بس انى عندى مشكلة ان بناتى مايحبوش الحليب
الكبيرة كانت ماتشربش فيه نهائيا لا هو ولا الزبادى مع انها كانت تاكل فيه وهيا صغيرة لكن كرهاته من اللى عمرها عام ونص وتوا بالمزاج يعنى وقت ماتطلب الحليب او الزبادى بس تشربهم يعنى مش كل يوم
واختها الصغيرة نفس الشي الحليب نهائيا ماتشرباش والزبادى بالمزاج
ياريت لو فى حد يقدر يساعدنى ويعطينى فكرة كيف نخليهم يحبوه مع العلم انى حاولت بشتى الطرق انهم يشربوه ومابوش الا بالمزاج وانى نبيهم يشربوه ديما وكل يوم
وبارك الله فيكم
وان شاء الله انكون قدرت نفيدكم ول بالقليل

بسم الله ماشاء الله ربنا يحفظلك بناتك واكيد الاخوات حيستفيدو من تجربتك
بالنسبة للبن بيتهيألي الاطفال مش بيحبوه علشان تقيل علي معدتهم ممكت تعمليه كاكاو وتخففيه بشويه ميه
ممكن تعمليه عصير بالفراوله
يوسف مش بينفع معاه الكلام ده لكن اعرف ناس كتير اولادهم بيحبو الحاجات دي
ربنا يهديلك بناتك ويوسف كمان

ربي يبارك فيك وفي بناتك
مشكورة
ممكن تساوي الحليب كوكتيل بالموز أو التفاح أو العنب أو الفراولة أو شوية كاكاو
ممكن تساويه مهلبية مثلا

ممكن تعطيها الحليب بطريقة مختلفة عن كل يوم
يعني بكاسة عليها أشكال تلفت انتباهها
و ممكن باللعب و الضحك

بارك الله فيكِ على مشاركتنا تجربتك
ربي يهديهم و يحفظهم جميعا
اللهم آمين

بارك الله فيكم على التفاعل
اختى ام يوسف ربي يبارك فيك ويهديلك ابنك ويهدى بناتى جربت بالفواكة والكاكاو ومنفعش عندك الكبيرة ممكن تشرب يعنى حسب المزاج اما الصغيرة ابدا ماتشرباش

اختى نور الهدى مشكورة على الرد وجربت انى نعملهولهم بالفواكه منفعش ومهلبية الصغيرة ابدا مابتش تاكلها والكبيرة كما سبق وان ذكرت لام يزسف بالمزاج احيانا تشرب واحيانا لا

اختى القنوعه نورتى موضوعى بردك وجربت اللى قلتى عليه واشتريت كبيات ملفته للانتباه ومنفعش وكل مرة نغير الكباية بشكل مختلف وجربت حتى نعطيهولهم وهما منسجمين مع التلفزيون ابدا بالذات الصغيرة ماتبيش حتى تذوقه من اللي تشمه تترك الكباية

مع العلم ان اختها الكبيرة كانت نفس الشي مستحيل اتذوقه وتوا مرة مرة تشرب فيه
ادعولى انهم يشربوه لانه مهم جدا ليهم

وبارك الله فيكم جميعا ودمتم بود

كتبت بواسطة ام سيف2007
اختى ما شاء الله عليك ربنا يخلى لك بناتك
ممكن تقراى موضوع الدكتورة شروق فى ركن الحمل والولادة عن المصادر الاخرى للكالسيوم غير الحليب



ويخليلك كل احبابك يارب
وان شاء الله حنشوفه الموضوع
بس انا سمعت ان السمسم غنى بالكالسيوم لهذا نعطى فيهم فى الحلوة الشامية (الحلاوة الطحينية)ياريت حد ياكدلى ويقولى صح معلومتى او خطأ