أخواتي الحبيبات
مدرسة أولادي مشهورة بكثرة النشاطات و المسابقات على اختلاف أنواعها
و أنا بحب الأولاد يشتركوا بكل النشاطات ...
بينمي دماغهم و بيستغلوا وقتهم بشيء مفيد ...بيحلوا عني شوي..
و بيعطيهم مجال للبحث و المعرفة
و بيتعودوا على المشاركة الاجتماعية
و بتقوى شخصيتهم...
المهم...اولادي صرتوا تعرفوهن...
وسيم آخر العنقود في الصف الأول الابتدائي
طلبت منهن معلمة العلوم عمل نشاط و أعطتهن عدة خيارات
اخترنا الموضوع يلي رح تشوفوه..
لوحة التزلج
المواد التي استخدمناها رح تبين معنا من خلال الصور و شرح الخطوات...
أحضرنا علبة كرتون فارغة لتكون أساس العمل ..ممكن علبة حلويات فارغة
نفرغ الوجه العلوي من الوسط و بحذر و ممكن نطلب مساعدة حدا كبير

الصراحة أختي تولت المساعدة بدل عني و أعطت وسيم كتير أفكار للمشروع

نحضر ورق ملون بلون أزرق أو ممكن نحن نلون ورقة بيضا بلون أزرق فاتح على أساس لون البحر
و نلصقها داخل العلبة
الوجه يلي فرغناه نلصق عليه قطعة نايلون سميكة و نلونها أيضا" بالأزرق الفاتح
استخدمنا ألوان الزجاج
لامعة و ثابتة ما بتروح ..

دورنا بالمخزن عند ماما بالألعاب القديمة شوفي أشياء ممكن نستفيد منها بالموضوع
على فكرة نحن ما منرمي شي
تعلمت من أمي أنه كل شي ممكن نستفيد منه ..بس يجي وقته
الألعاب القديمة منحتفظ فيها و نستفيد منها بأشياء تانية
المهم لقينا ...سمكات صغار، ألعاب على شكل أشخاص...قوارب صغيرة..

لونَا الأشخاص بألوان الزجاج لنغير هيئتهن و يبدواعلى أساس أنهم المتزلجين


السمكات نلصقها على النايلون من الجهة الداخلية لغطاء العلبة

الآن نغلق العلبة و السمكات في الداخل
نلصق الأطراف
خلاص السمكات صاروا بالبحر
نبدأ بتجهيز السطح
نلصق القطن الأبيض على الداير و نصف الأشخاص على النايلون ليبدوا و كأنهم يتزلجون



صنع وسيم مجموعة من البطاريق و أولادهم الصغار
شاف الطريقة بموقع لتعليم عمل أشكال من الورق ..تعمل و أتقن العمل و لوحده

و عملنا كمان رجل تلج صغير
وها هي النتيجة النهائية


المعلمة طار عقلها بالعمل و حبت الموضوع كتير
أتمنى أن ينال اعجابكم
خلصنا من وسيم خلينا نشوف وليد شو عمل...
وليد في الصف الأول الاعدادي
و طلبت منه معلمة العلوم هذا العمل
لعبة حفظ التوازن
الهدف من العمل اكتشاف آثار التيار الكهربائي
هذه اللعبة معروفة عند الكثيرين
المواد المستخدمة:
سلك معدني (موصل للكهرباء) استخدمنا علاقات الملابس المعدنية
قاعدة خشبية
أسلاك توصيل
جرس كهربائي أو لمبات صغيرة
بطارية جافة

نفرد العلاقة و نشكلها شكل الأرنب

نحضر قطعة خشب صغيرة و نقصها بشكل الجزرة و نحفر مكان العيون
ندهنها باللون البرتقالي

من ساعد وليد في المشروع هو بابا لأن احتجنا لقص و حفر و لِحام( في كسرة تحت اللام)

لوح الخشب رح يكون قاعدة اللعبة
و سنثبت باقي الأشياء عليه
من ورق الكورنيش و القطن الأبيض عملنا قعدة حلوة للأرنب يرتاح عليها.

نثبت الأرنب على الخشبة
نثبت الجزرة أيضا" بمادة لاصقة و نضع مكان كل عين لمبة صغيرة مهمتها أن تضيء عند اللعب

نعود لمخزن الألعاب و نحضر سيارة أو لعبة تعمل بالبطاريات و كنا رح نرميها
نأخذ منها بيت البطاريات حتى نخبي البطاريات المستخدمة بلعبتنا فيها و يكون شغلنا مرتب و حلو
كمان ناخذ مفتاح التشغيل(on/off)
من علاقة أخرى نصنع اليد التي سنستخدمها باللعب
هاي الخطوة ما قدرت صورها
كنت بالمطبخ المقر الرسمي لي و اجيت لقيتهن مخلصين شغل
حاولوا تتخيلوا و تفهموا عليي..
نصنع من سلك العلاقة حلقة صغيرة و نطوي الباقي على بعض ليصبح الذراع الذي سنمسك به
نوصله بالسلك الناقل و نغلفه بمادة عازلة
كرتون أو فلين
السلك الناقل سيتم توصيله للبطاريات و اللمبات و مفتاح التشغيل




كيفية اللعب

السلك يلي غلفناه موصول للبطارية و اللمبات يلي هي عيون الجزرة
على اللاعب أن يمرر الحلقة في سلك الأرنب دون أن تلمس الحلقة الأرنب و هذا هو اختبار التركيز و التوازن
لو لمست الحلقة المعدنية الأرنب سيتم توصيل الدارة الكهربائية و تضيء اللمبات( عيون الجزرة)

لو استطعنا تمرير الحلقة من بداية سلك الأرنب حتى الجهة التانية دون أن تلمس الحلقة السلك لن تضيء اللمبات و نفوز باللعبة
ممكن استخدام جرس كهربائي بدل اللمبات
و عمل الحيوان بأي شكل آخر

اللعبة حلوة و مفيدة و مسلية
جربوها و العبوها أنتو و أولادكم


كمان المعلة طار عقلها بالعمل
و اعطت وليد العلامة الكاملة



أتمنى التوفيق للجميع
نراكم بخير
الامتحانات بعد كام يوم و صار بدها هز كتاف
و بعدين الإجازة و بعدين رمضان
الله يعيده على الجميع بالخير و البركة
و كل عام و أنتم بخير