أخواتى الاعزاء انا محتاجة افضفض خلاص هطق تعبونى جدااا اهل زوجى واعذرونى لو أطلت عليكم

لكن فى حاجات خنقانى ومليش حد افضفضله غيركم بعد ربنا اشعر بالظلم منهم كلهم بدون استثناء

اولا :زوجى له اخين واختين هو اصغرهم وبالتالى انا اصغر من اخواته البنات ومن سلفاتى اعمارهم متقاربة مابين (44و50) وانا عندى27 وزوجى 33 فلذلك احنا دايما الغلطانين وهما عليهم

يقومونا ويصدروا احكام وعلينا التنفيذ.


فى البداية اناتزوجت مع مامة زوجى(حماتى) وهى سيدة كبيرة وكنت اعتبرها ومازلت والله اعتبرها

زى امى وكنت دخلة البيت وكلى امل انى اعيش عيشة هادئة مع زوجى وامه وعمرى ماخلفت كلامها

ولكنها كانت تشعرنى هى ان البيت مش بيتى ومليش انى اغير ترتيبه او اكون انا لى رأى فى اى شىء

حتى عمل الاكل هى التى كانت تقولى اعملى كذا ولو اقترحت انا وعملت يكون ردها ان ناقص ملح

او طريقة عمله مش زى ماهى بتعمله هى وبنتها .

ولوخرجت انا وزوجى ونعتبروا لسه فى شهر العسل زى ماهو معروف عند ناس كتير تزعل وتشتكى

ليهم ولو نمت تشتكى انى سيباها ولو زرت امى (التى تعيش وحدها) ارجع القيها مكشرة واسمع اللوم

والعتاب من بنتها مع انى كنت بروح لوحدى وزوجى بيفضل معها

حتى قال لى زوجى ابقى روحى لمامتك لما يبقى فى حدمنهم هنا

عارفين رجعوا يقولوا هى مش طايقة حد يجى ليه كل لما حد منا يجى هى تمشى وتروح لامها

وفى مرة جاءت سلفتى اللى هى سبب مشاكل كتيرة وكانت بتتغدى معنا فقالت لها حماتى انتى مش

عجبك الاكل دانا اللى عملته قالت اة منا عارفة اكلك ياماما طبعا وكلام من ده كتير

وكان يجى عليا رمضان اكون نفسى افطر مع امى ومكنش ينفع وزوجى كان يطلب منهم حد يجى يفطر

مع والدته عشان اعرف اروح لامى كان اللى يجى حد من احفادها حتى احفادها مسلمتش منهم

كانوا قريبين منى فى السن ومنهم من كان يحترمنى وانا كذلك ومنهم من يتجاهلنى كأنى دادة لجدتتهم

السلام بااااااااااارد جداا وبمنتهى قلة الذوق وكنت اشتكى لزوجى يقولى معلش عيال وفى قرارة نفسه

غير راضى وكانت والدته تتأثر بأى مكالمة تليفون من بنتها اومن سلفتى انا لى اتنين واحدة كانت على

الحياد والتانيه اللى سبق ذكرها هى بس تكلم حماتى فى التليفون وعلى طول حماتى تتغير سواء معى

او مع زوجى وكتير اتهمونا اخواته سواء الرجال او البنات بالتقصير مع والدته حتى قال له زوج اخته

الكبير ( طريقتك انت ومراتك مع امك مترضيش حد) مع انى وربنا يعلم كنت احضر لها الفطار واجيبه

لهافى السرير وهى كانت بتقول ده امامى وهى بتتكلم مع بنتها الصبح وكتر كلامهم وتحريضهم لدرجة

انها اصبحت متتكلمش معى الا عشان تأمرنى بأى حاجة اعملها واصبحت الحياة لاتطاق

وفى يوم كانت فى عاصفة ترابيه(الخماسين)والكل يعلم انها بتيجى كل سنة والشارع نفسه بيكون ملىء

بالتراب جاءت اخته واتهمتنى بعدم النظافة وقالت لزوجى امى كده هتتعب انتم عاوزين تموتوها انا قاعدة هنا فى بيت ابويا .

قال زوجى خلا اقعدى وانا ومراتى هنمشى ونريح الكل.

وفعلا نقلنا لمسكنا الحالى وعيشت ايامى الجميلة ومع ذلك كان زوجى يصحبنى معه لزيارة والدته

واخته ولم ارفض وقلت خلاص طالما بقى لى منزل خاص بى.

وجاءت سلفتى لتعيش مع حماتى وبدأت تقلب الدنيا علىوقالت كلام على لسانى لحماتى انى اشتكيت

لها منها ومن معاملتها وانها بخيلة على وانى مش واخدة راحتى قال زوجى نواجههم ببعض رفضت

هى ورفضت حماتى منعا" للمشاكل وقالتله لو مراتك قالت كده احنا مسمحنها

قلت لحماتى دى كذابة انا مقلتش كده خالص ومليش معها كلام اصلا

المهم خفيت رجلى من هناك شوية وطبعا ده مكنش عاجب زوجى اخذنى تانى وفى كل مرة تعدى ومتسلمش عليا ومرة دخلت وسلمت على كل اللى موجودين وكمان زوجى الا انا ومحدش ردلى اعتبارى وقالو ا متخديش فى بالك.

وعملت ان عندها الحق وانى انا بكذبها وان ازاى زوجى يواجهنا وهى الكبيرة يعنى هو مكذبها وهى اللى ربته

وتوالت الزيارات وقالت لى حماتى احنا مش عاوزين العيلة تتفكك انتم بقالكم سنة متخاصمين ومش

عاوزة الاخ يخسر اخوه قلتلها ياماما انا اهم حاجة عندى رضاكى انا من نفسى كنت هسلم عليها المرة اللى فاتت
ولكنى كرامتى منعتنى قالتلى لا بلاش اصلها حلفة ماتحط ايدها فى ايدك زعلت وقلتلها امال انتى عاوزة تصلحينا ليه لما انتى عارفة كده

قالت انا عاوزة الاخوات لما يشوفوا بعض يسلموا على بعض وكمان عاوزة جوزك يسلم عليها دى هى اللى مربياه

المهم عدى كمان سنة وجاء رمضان واول يوم قالوايصلحونا جاء زوج اخته الكبرى وده رجل طيب

وكبير فى السن وقالى يلا سلموا على بعض سلمنا وطبعا وشها اسود فحمة تقولى حماتى ايه؟

بوسى راسها.شوفوا الظلم بصيت لها قالتلى معلش انتى الصغيرة المهم عملت كده وانا الدموع هتنفجر

من عينى وعلى طول اخدنى زوجى وروحنا وزعلت منه وقالى معلش انتى كبرتى فى نظرى وفى نظر كل الموجودين

ورجعت ريمة لعدتها كل لما نروح نزور والدته تعدى تسلم بالسان بس

وحصل بينى وبين زوجى مشكلة كنت قد حكيتها فى المنتدى وكنت زعلانة منه جداا حتى جاء فى يوم و

قالى ماماعاوزانا نقعد معها 20 يوم عشان سلفتى وجوزها وراهم مشوار وهيرجعوا بيتهم ايه رأيك؟

قلتله لا بلاش انا مش هرتاح وهو اصر وزعل وانتم اخواتى نصحتونى انى اذهب المهم روحنا وكانت

ايام مملة جدااا ولاحظت والدته انى انا وزوجى متغيرين فحكيت لها اللى حصل مابينى وبينه والله

حسيت انى عاوزة اقرب منها وحكيت لها لاقيت بعد كده اخته الكبيرة عارفة وتقولى فى التليفون

عامل ايه معاكى ابقى دورى وراه عارفين زعلت منها جداا وزعلت من نفسى وكل شوية تقولى الناس مش ناقصة

وبدأت اخته الصغرى تمارس نشاطها وتقولة ماما خسة وشوية ان زوجى هوكمان خاسس وانتى لازم

تهتمى بيه شوية ومينفعش كده ومش عارفة تشيلنى هم ايه ولا ايه المهم رجعنا بيتنا.

وامبارح ذهب زوجى لزيارة امه وكانت سلفتى التانية هى اللى هناك وقالتله انها زعلانة منى عشان

انا مسلمتش على ابنها كويس فى العيد الكبير (تصدقوا) ففتح معها المشكلة القديمة اللى هى سبب نقلنا من البيت

قالت اصل مراتك مكنتش بتحب حد يجى وكان كل اللى يجى يلقيها متغيرة وكل شوية عند امها

قالها انتوا بتعملوها ليه كده ليه مش بتقربوهامنكم وتتكلموا معها انا بلاحظ لما بنتجمع هنا كل واحدة

تأخد التانية وتسيبوها لوحدها قالت اصل مفيش حوار بينا حكالى الكلام ده اتجننت وقلتله حرام

عليكم انتم تعبتونى مش عارفة ارضيكم ليه كده وقلتله من فضلك حافظ على الشوية اللى فضلين من

كرامتى انا قلتلك مروحش هناك تانى زعلت انامش عاوزة ادخل البيت ده تانى قالى مينفعش وزعل و

قلبت بنكد طول اليوم ؟

معلش اخواتى انا عارفة انى طولت قوى بس من حرقة قلبى مش عارفة اتعامل معهم ومش عاوزة

اتعامل اصلا بس هو مش فاهمنى ولا عذرنى مع انه لامس وشايف الوضع بس دايما بيجى عليا انا

احبائى سامحونى على الاطالة واشكركم لسعة صدوركم