السلام عليكم أخواتي
اشتقتلكن كتير بس كنت كتير مشغوله

عزيزاتي يا ريت اللي ساكنين بمدينة تورنتو بكندا يردو على هالموضوع ويا ريت يساعدوني في الإجابه على بعض الأسئلة
انتو ابعتولي مين سكان في تورنتو او كان ساكن هنيك بعدين بسأل
وتسلمولي والله يحظكن يا رب

مش أنا.. بس أم شهد، وسيما، وJUJU وdidi وأم مودي.. وبعد فيه كثير.. أه، وأخي كمان وأنا قريبة منهم

تسلمي اخت إيمان الله لا يحرمنا منك
يعني بصراحه كنت حابه أسأل عدة أسئلة بخصو الشقق
يعني بصراحه انا رح اشحن فرشي معي لانو جديد وما الي شي شاريتو يعني فكنت حابه اسأل هل كل الشقق مفروشه ؟؟؟؟
وهل صحيح ان حتى الغير مفروش يكون فيه أدوات كهرباء ؟؟؟؟
وكمان سمعت انو في الشقق ممكن انو يتشاركو بالـ loundry room ؟؟؟ يعني مو ممكن يكون الي غسالتي لوحدي!!!!!!
وشو المنطقة الكويسه يعني هناك ؟؟؟؟ وهل الشقق مزودة بنظام securety ؟؟؟؟
وشو أحسن house, town house, or appartment
يعني من ناحية الأمان والأمان بالله طبعا ؟؟؟؟؟؟ نحن جلستنا يعني رح تكون 3 سنين مو أكتر
معليش اسئلة كتير سامحوني بس عن جد خايفة كتير ومدايقة

أول شيء أهلاً وسهلاً بك في كندا
متى جايين يا ترى؟ حتى آجي أزورك
النسبة للشقق، فهذا بقدر أجاوبك عليه حتى وأنا مش ساكنة في تورونتو، لأنه هذا شيء مشترك بكل أمريكا وكندا.. الشقق عادة غير مفروشة، نسبة قليلة المفروشة وهذه عادة يستأجرها الطلاب وبتبقى شيء بسيط وتعبان. يعني الشقق غير مفروشة. الشقق عادة بتكون كهربائياتها معها، يعني البراد، الغاز والمايكروويف أحياناً وجلاية صحون بعض الأحيان. بعض الشقق بتكون فواتيرها فيها، يعني الكهرباء والماء يدفعها صاحب الشقة، ولكن مش كل الشقق، بدك تشوفي أحسن شيء مناسب لك.
الغسالة فيه شقق بتكون سعرها أغلى وبيكون معها غسالة ونشافة وأنا أعتقد أنه محرزة تدفعي المبلغ الإضافي حتى تغسلي بالبيت.. لأنه الكثير من الشقق ما بيكون فيها غسالة ونشافة مثل ما ذكرتي، وهذا يعني لازم تطلعي من شقتك حيث غرفة الغسيل التابعة للبناية. وهذه مزعجة صراحة، وفي العادة الرجال اللي بيقوموا بهذا العمل حماية لزوجاتهم.
ولهذا بنصحك إنك تستأجري شقة فيها غسالة ونشافة.

بالنسبة للأفضل، دائماً الأفضل يكون بيت، لكن الأجارات في تورونتو ناااااااااااااااااااااااااااااار مولعة.. يعني أغلى منطقة تعتبر، ولكن فيه مناطق أغلى من مناطق. يمكن كونك مش جاي تعيشي هون لفترة طويلة، الأفضل يكون سكنك في تاون هاوس، يعتبر لأنه واسع بشكل كافي لعائلة صغيرة، ومنفصل عن إزعاج الجيران، سعره أخف من البيت المنفصل، ولكنه يشترك بحائط مع الجيران
أما بالنسبة للأماكن الآمنة والشقق المفضلة... سأترك المجال لأم شهد تخبرك بالتفاصيل وأنا سأسأل زوجة أخي لأنها خبيرة بالمنطقة لأنها دورت كثير وما خلت مكان وقت النقل ما سألت فيه أو شافته

مرحبا اخت ايمان
والله مائة اهلين وسهلين بتنورينا والله ايمتى ما بدك تفضلي ... انا انشاء الله رح اجي يمكن بأول فبراير
وتسلمي اختي على المعلومات والله معزبنك معنا دائما ....
وعم بستنى منك رد كمان من مرت اخوك يعني مو بس عم نتغالظ عليك عم نتغالظ على مرت اخوك كمان سلميلنا عليها
وبارك الله فيك

السلام عليكم ورحمة الله وبركاته
اهلا وسهلا فيكي بس ما تشكي من البرد وانتي ما شاء الله جايه علي فبراير ليه تشحني عفشك حرام لانو هيكلفك وانتي ما راح تقعدي مده كبيره هنا بحق الشحن بتشتري عفش انا في مونتريال والشقق هنا ماشي حالها ما بين600 الي1200$في الشهر كندي وهو عباره عن غرفتين وصاله بس في تورونتو نااااااااااااررررررررر بس في اطرافها ماشي الحال بالنسبه للايجار واغلبهم فيهم الغاز والتلاجه ويمكن( الغساله والنشافه وجلايه الصحون) مش كل الشقق والغساله احسن حاجه تكون في الشقه او انك تشتري وحده لانو مو حلوه فكره الغسيل في غسالات العماره بالنسبه الك احسن حاجه تسكني في شقه عاديه اتمشي الحال ويكون عليها مواصلات سريعه وبعدين ادوري علي راحتك لانك ما بتكوني عارفه المنطقه وما في سياره وما تاخدي شقه مفروشه لانها ما بتكون نضيفه زي ما بدك بتشتري عفش احسن
ونصيحه اخيره طولت عليكي جيبي معك بس ما تضحكو وتعلقو علي( صحنين وكم كبايه وكم معلقه وبراد شاي وحله صغيره علي عدد افراد البيت ) ما تضحكو علي لانك مش من اول يوم حتروحي السوق تشتري اغراض وحاجات اتمشيكي لما تشتري

شوفي يا ستي نبدأ أولا بالطقس الطقس الشتاء قارص في كندا والله يكون بالعون
اما بالنسبه للعفش نصيحتي لا تنقليه معك وخاصة انك مش مستقرة أكثر من ثلاث سنين وزي ما فمهت انه عفشك جديد فلا تبهدليه بالسفر وغيره وراح كمان يكلفك بلاوي

بالنسبة للبيوتhouses أسعارها أغلى شئ يعني من 1700 دولار بالشهر
اما townhouseبحدود 1200-1700 حسب البيت
اما الشقق apartments فهي بحدود 1000-1200متوفر فيها الثلاجة والغاز أكيد اما الغسالة والنشافة وغسالة الصحون مش في كل الشقق ...طبعا العمارة لا يوجد فيهاsecurity ولكن يوجد كاميرات مراقبة
والغسيل يكون في أسفل العمارة وصراحة انا ما عشت بشقق اول ما سكنت كنت في condosفما بعرف بالظبط شو الخدمات المتوفرة في الشقق
اماcondos الاجار بجدود 1400-1500 دولار بالشهر بكون فيها الثلاجة والغاز الغسالة والنشافة وغسالة الصحون الكهرباء والماء على صاحب الشقة متوفر التدفئة المركزية في الشتاء والمكيف في الصبف على طول
يوجدsecurity في داخل وخارج البناية بالاضافة الى موقف السيارات تحت الارض مزود بنظام مراقبة مع أعطاء المستأجر Acsses cardللدخول والخروج من البناية يعني لا أحد يقدر يدخل العمارة الا بالكارت الخاص للدخول
والزوار لازم انتي تفتحي لهم الباب عن طريق رقم خاص من تلفونك ..وأذكر انه في العمارة اللي كنت ساكنه فيها يوجد محطة خاصة في التلفزيون يمكنك تشاهدي العمارة من الاسفل والزوار الذي يأتون لزيارتك والتأكد من هويتهم قبل الدخول على البناية ويوجد طبعا مسابح وغرفة مجهزة بأجهزة رياضيةوالاوزان مكتبة تنس أرضي بلياردو ساونا جاكوزي تانك (اذا بتحبي تسمري حالك) غرفة احتفالات غرفة للضيوف يعني اذا جاءك ضيف مش عارفة وين ينام يوجد غرف اسفل العمارة مجهزة مثل غرف الاوتيل تستأجريها لمدة يوم او يومين مثل ما بدك بس كل شئ في حسابه طبعا
طبعا ايضآ العمارة مزودة فيlobby يمكنك الجلوس فيها ...يعني زي ما تحكي نظام خمس نجوم كل شئ متوفر وخاصة الأمان بشكل رهيب

أفضل المناطق للسكن صراحة انا المنطقة اللي انا عايشة فيها صراحة قمة في النظام والترتيب ومتوفر فيها كل شئ ولا تشعري بالملل فيها
متوفر فيها المدارس الاسلامية والمحلات العربية لا تعد ولاتحصى كل شئ متوفر
المساجد الجاليات العربية وين ما تروحي مليان عرب ومسلمين وأهم شئ من اكثر المدن أمان في تورنتو

أش كمان يا سيما أش كمان بكفي وجعت لك راسك
واي سؤال انا في الخدمة